Vdiq 5-vjeçari i cili mbeti i bllokuar për disa ditë në një pus

 
Pallati mbretëror maroken tha të shtunën se një djalë 5-vjeçar, i cili ishte bllokuar në një pus të thellë për katër ditë, ka vdekur.
Mbreti maroken Mohammed VI shprehu ngushëllimet e tij për prindërit e djalit në një deklaratë të lëshuar nga pallati.
Djali, Rayan, u tërhoq të shtunën në mbrëmje nga ekipet e shpëtimit pas një operacioni të gjatë që tërhoqi vëmendjen globale.
Një reporter i Associated Press në vendngjarje pa djalin të mbështjellë me një batanije të verdhë pasi doli nga një tunel i gërmuar posaçërisht për shpëtimin.
Prindërit e tij ishin shoqëruar në një ambulancë përpara se djali të dilte. Gjendja e tij kishte tërhequr vëmendjen mbarëbotërore.
Ekipet e shpëtimit përdorën një litar për të dërguar oksigjen dhe ujë tek djali, si dhe një kamerë për ta monitoruar atë. Deri të shtunën në mëngjes, kreu i komitetit të shpëtimit, Abdelhadi Temrani, tha: “Nuk është e mundur të përcaktohet fare gjendja e fëmijës në këtë moment. Por ne shpresojmë te Zoti që fëmija është gjallë”.
Rayan ra në një pus 32 metra të vendosur jashtë shtëpisë së tij në fshatin Ighran në provincën malore veriore të Marokut Chefchaouen të martën në mbrëmje.
Për tre ditë, ekipet e kërkimit përdorën buldozerë për të gërmuar një kanal paralel. Më pas, të premten, ata filluan të gërmojnë një tunel horizontal për të arritur tek djali i bllokuar. Agjencia e lajmeve MAP e Marokut tha se ekspertët në inxhinierinë topografike u thirrën për ndihmë.
Temrani, duke folur për televizionin lokal 2M, tha të shtunën se shpëtimtarëve i kishin mbetur vetëm dy metra për të gërmuar për të arritur në gropën ku djali është bllokuar.
“Gërmuesit hasën në një shkëmb të fortë gjatë rrugës së tyre dhe për këtë arsye ishin shumë të kujdesshëm për të shmangur ndonjë rrëshqitje dheu apo çarje”, tha ai. U deshën rreth pesë orë për të hequr qafe shkëmbin, sepse gërmimi ishte i ngadaltë dhe u bë me kujdes për të shmangur krijimin e çarjeve në vrimë nga poshtë, të cilat mund të kërcënonin jetën e fëmijës si dhe të punonjësve të shpëtimit.
Puna ka qenë e vështirë për shkak të frikës se dheu që rrethon pusin mund të shembet mbi djalin.
Prindërve të tij të shqetësuar iu bashkuan qindra fshatarë dhe të tjerë që ishin mbledhur për të parë operacionin e shpëtimit.

Fshati me rreth 500 banorë është i mbushur me puse të thella, shumë të përdorura për ujitjen e kulturës së kanabisit që është burimi kryesor i të ardhurave për shumë njerëz në rajonin e varfër, të largët dhe të thatë të maleve Rif të Marokut. Shumica e puseve kanë mbulesa mbrojtëse.
Rrethanat e sakta se si djali ka rënë në pus janë të paqarta./21Media