Vetëvendosje thotë se MASHTI ka hequr tarifën për studentët e nivelit Bachelor dhe Master

Lëvizja Vetëvendosje ka bërë të ditur se Ministria e Arsimit, Shkencës, Teknologjisë dhe Inovacionit ka hequr tarifat për studentët e nivelit Bachelor dhe Master, duke filluar nga viti akademik 2021/22.
Përme një postimi në Facebook, Lëvizja Vetëvendosje ka thënë se lirimi i studentëve nga tarifat në universitetin publik është në përputhje me programin qeverisës të Qeverisë Kurti II.
“Arsim publik falas është kërkesë e kamotshme e studentëve të Universitetit Publik në Kosovë. Kësaj kërkese sot iu përgjigj ministrja e MAShTI-t, Arbërie Nagavci, e cila i siguroi studentët që janë hequr tarifat për nivelin Bachelor dhe Master, dhe që një gjë e tillë po provohet të bëhet edhe me nivelin e doktoratës. Arsimi është një e drejtë për të cilën nuk duhet të paguaj askush, andaj, filluar nga ky vit akademik 2021/2022, në përputhje me Programin Qeverisës të Qeverisë Kurti II, studentët do të lirohen nga tarifat në Universitetin Publik. Më shumë mundësi e më shumë barazi, për të gjithë dhe pa dallim”, ka shkruar Lëvizja Vetëvendosje./21Media