Vizita e Putinit në Serbi, Krasniqi sqaron mesazhet për Kosovën
Mesazhet e Putinit e përkeqësojnë gjendjen e Kosovës në arenën ndërkombëtare
Presidenti rus, Vladimir Putin vizitoi sot Serbinë. Gjatë kësaj vizite, Putin diskutoi zgjidhjen e krizës së Kosovës, bashkëpunimin ekonomik dhe çështjet rajonale me homologun e tij Aleksandër Vuçiç. Profesori universitar, Milazim Krasniqi e sheh këtë vizitë negative në raport me Kosovën. Ai në një intervistë për portalin rtv21.tv shpejgoi mesazhet që bartë kjo vizitë.
Si komentoni vizitën e Presidentit të Rusisë, Vladimir Putin në Serbi?
Vizita e Putinit në Serbi është shenjë e një partneriteti strategjik që është shpallur shumë më herët, i cili tash kurorëzohet faktikisht me futjen e Serbisë në orbitën e ndikimit rus. Kjo u pa edhe gjatë vizitës së sotme me rreth 20 marrëveshje ndërmjet dy qeverive, u pa edhe me deklaratat e Putinit që e quajti Serbinë shtet vëlla dhe serbët vëllezër, pra me gjithë ikonografinë dhe retorikën tregon që idetë e pansllavizmit dhe panortodokësisë janë idetë dominonte. Kjo në fakt do të thotë se Serbia nuk ka kurs të mirëfilltë evropian, por më shumë anon drejt pansllavizmit edhe panortodokësisë si një lloj sateliti nën ndikimin rus .
Çfarë ndikimi do të ketë kjo vizitë për Kosovën?
Unë besoj se ndikimi i kësaj vizite në raport me Kosovën do të jetë shumë negativ , (Putin) në intervistën që ka dhënë për gazetat “Politika” dhe “Večernje novostika” ka kërcënuar shumë ashpër për Kosovën, ka thënë që Kosova është shpallur shtet në kundërshtim me të drejtën ndërkombëtare ndërsa e vërteta është që Gjykata Ndërkombëtare e Drejtësisë e ka shpallur që Kosova nuk është shpallë shtet në kundërshtim me të drejtën ndërkombëtare. Pra ai vazhdon një armiqësi të ashpër ndaj Kosovës po ashtu ka deklaruar që shndërrimi i FSK-së në ushtri do ta destabilizojë Ballkanin. Me një fjalë edhe në këtë vizitë ai ka shprehur armiqësi të hapur ndaj Kosovës, gjë që me siguri ka me pasur reflektime në dialogun e ardhshëm kështu që Serbia sigurisht do të merr një kurs edhe ma të ashpër ndaj Kosovës.
Si pritet të reagojë Bashkimi Evropian pas kësaj vizite?
BE-ja në raport me Rusinë është shumë inferiore nuk ka as kapacitete as fuqi që të rezistojë ndaj presioneve ruse, veçmas janë nën presion republikat baltike, Rumania mbase edhe Gjermania, kështu që Bashkimi Evropian nuk do të ketë fuqi të rezistojë. Jam i bindur që procesi i integrimit të Serbisë do të ngadalësohet mbas kësaj vizite ashtu që dështimi i Bashkimit Evropian në Serbi, por edhe dështimi në negociata ndërmjet Kosovës dhe Serbisë do të jetë evident mbas kësaj vizite.
Cili do të jetë roli i Amerikës në raport me Kosovën pas kësaj vizite?
Problemi më i madh në krejt këtë është roli i Amerikës që është i paqartë sepse politika e Trumpit nuk është politikë e kontinuitetit në administratat e mëhershme të Obamës , George Bush dhe Clintonit, është një politikë e paqartë, është një politikë me elemente aventurizmi, kështu që kjo paraqet shqetësim shtesë edhe për Kosovën edhe për Ballkanin, sepse Amerika së paku me këtë që po shihet nuk është më ajo e vjetra që i ka të qarta sferat e interesit dhe që i mbron ato sfera interesi nga ndikimet ruse.
Kur po thoni që Amerika nuk është e njëjta, në këtë rast kah po shkon Kosova?
Kosova është në një situatë jashtëzakonisht të keqe shumë të vështirë, Bashkimin Evropian e udhëheqë për këtë periudhë gjashtë mujore Rumania e cila nuk e njeh Kosovën, OSBE-në e udhëheq Sllovakia e cila nuk e njeh Kosovën, zyrtarët e Administratës Amerikane në krye me John Boltonin proklamojnë një marrëveshje që nuk përjashton edhe shkëmbimin e territoreve, pra Kosova është në vështirësi shumë serioze në këtë konsullacion ndërkombëtar. Pra, mesazhet e Putinit në Beograd po ashtu e përkeqësojnë edhe ma shumë tablonë lidhur me gjendjen e Kosovës në skenën ndërkombëtare.
Ku e shihni zgjidhjen për Kosovën në këtë fazë?
Zgjidhjen të them të vërtetën momentalisht nuk shoh zgjidhje të mirë për Kosovën, prandaj ka kohë që kam thënë që zgjidhja më mirë për Kosovën është status quo-ja, pra me e shty sa ma larg që të jetë e mundur këtë procesin e negociatave deri sa të qartësohet politika amerikane dhe derisa të ndryshon udhëheqja në Bashkimin Evropian. Përndryshe në këtë momentum të cilin jemi, klima kundër Kosovës është goxha armiqësore në të gjitha drejtimet, vet fakti që nuk jepet liberalizmi i vizave, vet fakti që ka filluar me intensitet enorm të punës Gjykata Speciale, vet fakti që ndaj qeverisë së Kosovës edhe Administrata Amerikane bën presion për heqjen e taksës tregon që Kosova nuk i ka punët mirë në arenën ndërkombëtare.
Cili është mesazhi i qenit të Sharrit të cilin Vuçiq ia dhuroi Putnit?
Qeni i Sharrit në literaturë është mësuar si Qen Mollos Ilir. Viti 1931 sa mbaj mend në Jugosllavi është marrë një vendim me ia ndërruar emrin prej Qen Ilir me e bërë Qen Sharri. Do me thënë e kanë uzurpuar si edhe lahutën. Mesazhi është që Putini ta mban atë qen në shtëpi dhe çdo ditë të mendojë për prejardhjen e atij qeni, prejardhja e tij është prej Kosovës, pra që të mendojë për Kosovën sot, pra është një mesazh djallëzor, dinak, i mbrapshtë por kjo është gjendja reale tash për tash./21Media