Wallace bën një vizitë të paparalajmëruar në Ukrainë

Sekretari i Mbrojtjes i Mbretërisë së Bashkuar, Ben Wallace, i cili bëri një vizitë të paparalajmëruar në Kiev këtë javë, ra dakord të punojë “edhe më ngushtë” me Ukrainën gjatë takimit me Presidentin ukrainas, Volodymyr Zelensky dhe Ministrin e Mbrojtjes Oleksiy Reznikov.
“Të tre ranë dakord të punojnë edhe më ngushtë duke ecur përpara në mbështetje të qëllimit të tyre të përbashkët për të mundësuar Ukrainën të çlirohet nga pushtimi i paligjshëm rus”, sipas një njoftimi për shtyp të Ministrisë së Mbrojtjes të Mbretërisë së Bashkuar.
“Ata diskutuan gjithashtu gamën e pajisjeve dhe trajnimeve që Mbretëria e Bashkuar po ofron aktualisht dhe çfarë mbështetje të mëtejshme mund të ofrojmë për të ndihmuar forcat ukrainase për të mbrojtur vendin e tyre”, thuhet tutje në njoftim.
Nuk dihet se kur është zhvilluar takimi. Ministria e Mbrojtjes tha se udhëtimi dy-ditor u zhvillua “këtë javë” dhe Zelensky postoi video të takimit në kanalin e tij zyrtar Telegram të premten pasdite, transmeton rtv21.tv.
Zelensky i tha Wallaces gjatë takimit se “lufta është një manifestim i madh se kush janë miqtë tanë të vërtetë” dhe se Mbretëria e Bashkuar kishte dëshmuar se ishte e tillë.
“Jam shumë mirënjohës për një punë kaq të bashkuar. Këto fjalë janë vazhdimisht në veprim, dhe ky është një ndryshim shumë i rëndësishëm midis marrëdhënieve të Ukrainës me Britaninë e Madhe dhe vendeve të tjera. Armët, financat, sanksionet janë tre gjëra në të cilat Mbretëria e Bashkuar ka treguar vazhdimisht lidershipin e saj” , tha Zelensky./21Media