Zelensky tha se Ukraina nuk sulmon territorin rus

(Lajm i përditësuar)

Ukraina nuk ka plane të godasë objektiva në Rusi, ka thënë presidenti Volodymyr Zelensky në Gjermani, ku Kievi siguroi një paketë të re të madhe ndihme të mbrojtjes.

“Ne nuk po sulmojmë territorin rus”, tha ai pas bisedimeve në Berlin me kancelarin, Olaf Scholz.

“Ne po përgatisim një kundërsulm për të de-okupuar territoret e pushtuara në mënyrë të paligjshme”, shtoi Zelensky.

Scholz u zotua të mbështesë Ukrainën “për aq kohë sa të jetë e nevojshme”, duke premtuar armë me vlerë 2.7 miliardë euro.

Rusia akuzon Ukrainën se ka goditur vazhdimisht objektiva brenda Rusisë, duke përfshirë një sulm të raportuar në Kremlinin e Moskës në fillim të këtij muaji.

Ukraina i mohon akuzat, ndërsa thekson gjithashtu se ka të drejtën legjitime për të përdorur forcën dhe mjete të tjera për të de-okupuar plotësisht territoret e saj aktualisht nën kontrollin rus. Këto përfshijnë katër rajone në jug dhe lindje, si dhe gadishullin e Krimesë, të aneksuar nga Moska në 2014.

Zelensky viziton Gjermaninë një ditë pas premtimit për armë

Volodymyr Zelensky presidenti i Ukrainës është në Berlin për bisedime me kancelarin gjerman Olaf Scholz dhe presidentin Frank-Walter Steinmeier, vizita e tij e parë në Gjermani që nga lufta në Ukrainë.

Udhëtimi vjen një ditë pasi Gjermania njoftoi se do të furnizonte Kievin me armë me vlerë rreth tre miliardë dollarë.

Më vonë të dielën, Zelensky do t’i jepet një nder prestigjioz, çmimi Charlemagne. Çmimi njeh ata që bëjnë më shumë për të promovuar unitetin evropian. Fituesit e mëparshëm përfshijnë Winston Churchill, Papa Françesku dhe Bill Clinton.

Duke mbërritur në Gjermani, Zelensky shkroi në Twitter: “Tashmë në Berlin. Armët. Paketa e fuqishme. Mbrojtja ajrore. Rindërtimi. BE. NATO. Siguria.”

Të shtunën, Gjermania zbuloi paketën e saj më të madhe të ndihmës ushtarake për Ukrainën.

Berlini tha se do të furnizonte Kievin me armë me vlerë 2.7 miliardë euro, përfshirë tanke Leopard dhe sisteme kundërajrore.

Për arsye sigurie, qeveria gjermane ka publikuar disa detaje rreth lëvizjeve të Presidentit Zelensky sot – por ai tashmë është takuar me presidentin gjerman dhe pritet të zhvillojë bisedime me kancelarin Olaf Scholz më vonë.

Mediat gjermane raportuan gjithashtu se pasdite, Zelensky do të udhëtojë në qytetin perëndimor të Aachen për të marrë pjesë në ceremoninë e çmimit të Karlit të Madh.

Avioni i liderit ukrainas mbërriti i shoqëruar nga dy avionë luftarakë të forcave ajrore gjermane.

Zelensky fluturoi nga Italia gjatë natës pas një vizite atje të shtunën, gjatë së cilës ai takoi Presidentin Sergio Mattarella, Kryeministrin Giorgia Meloni dhe pati një audiencë private me Papa Françeskun./21Media