Zemaj reagon pas riemërimit të Vitisë si ministër: Dështimi e degradimi vazhdon

Ish-ministri i Shëndetësisë, Armend Zemaj, ka reaguar pasi, Arben Vitia u rikthye në postin e ministrit të Shëndetësisë.
Zemaj ka thënë se “qasja nuk po ndryshon dhe dështimi e degradimi po vazhdon”.
“Ministri i Shëndetësisë nuk ndryshon. Qasja nuk ndryshon. Ndaj, dështimi e degradimi vazhdon. Zoti i ruajt mjekët e infermierët e mbetur në vend si dhe pacientët që kanë nevojë për shërim!”, ka shkruar Zemaj në Facebook.
Kryeministri i Kosovës, Albin Kurti sot ka emëruar Arben Vitia, Ministër për Shëndetësi. Këtë e ka bërë të ditur zyra e kryeministrit përmes një njoftimi për media.
“Kryeministri i Republikës së Kosovës, Albin Kurti, sot ka emëruar Arben Vitia, Ministër për Shëndetësi, të cilit i ka uruar suksese në plotësimin e detyrave dhe përgjegjësive të tij”, thuhet në njoftim.
Vitia e kishte lënë këtë detyrë, për t’i hyrë garës për kryetar të Prishtinës, të cilën e kishte humbur nga kandidati i LDK-së, tani kryetar i kryeqytetit, Përparim Rama.
Ministria e Shëndetësisë ishte pa ministër që nga 6 tetori kur edhe kishte dhënë dorëheqje nga kjo pozitë, Rifat Latifi./21Media