Nëna dhe 3 fëmijët dyshohen se u vetëmbytën në lumë, arrestohet burri
(Lajm i përditësuar)
E.A është arrestuar nga policia pas zhdukjes së gruas së tij bashkë me tre fëmijët.
Ai akuzohet për dhunë në familje dhe dyshohet se ka shkaktuar vetëvrasjen e vajzës së tij 9 vjeçare që u gjet në ujërat e lumit Buna nga një peshkatar ditën e djeshme.
Burime për Ora News bëjnë më dije se 31-vjeçari gjatë marrjes në pyetje nga policia e shtetit nuk ka qenë i ftohtë duke mbajtur qëndrime mohuese.
Pasi policia i ka treguar shenjat e dhunës të vajzës së madhe ai nuk ka dhënë asnjë reagim, duke i qëndruar versionit të tij.
Njoftimi i policisë:
Shkodër
Hetimet e thelluara zbardhin një rast të dhunës në familje, që shkaktoi vetëvrasje.
Vihet në pranga 31-vjecari, për dhunë ndaj bashkëshortes dhe 3 fëmijëve, si dhe për shkaktim të vetëvrasjes së vajzës së tij 9-vjeçare, si pasojë e dhunës.
9-vjeçarja ështe gjetur e pajetë, dyshohet e vetëmbytur në lumin Buna.
Polumbarët e RENEA-s vijojnë kërkimet pasi dyshohet se janë vetëmbytur dhe bashkëshortja dhe 2 fëmijët e tjerë të 31-vjeçarit.
Menjëherë pas kallëzimit të shtetasit E. A., 31 vjeç, të bërë më datë 03.05.2024, se më datë 02.05.2024, ishin larguar nga banesa, bashkëshortja e tij, shtetasja A. A., 39 vjeçe dhe 3 fëmijët e tyre të mitur (9, 8 dhe 3 vjeç), u ngrit një grup i posaçëm hetimor për të hetuar shkaqet e largimit nga banesa.
Bazuar në hetimet e kryera dhe inteligjenca policore, dyshohet se shkaku i largimit nga banesa ishte dhuna e ushtruar nga 31-vjeçari, ndaj bashkëshortes dhe fëmijëve, të cilët dyshohet se mund të kenë kryer vetëvrasje.
Më datë 04.05.2024, u bë ndalimi i shtetasit E. A., 31 vjeç (i dënuar më parë për kultivim të bimëve narkotike), për veprën penale “Shkaktimi i vetëvrasjes”.
Grupi hetimor ka vijuar hetimet dhe shërbimet e Policisë kanë vijuar kontrollet për gjetjen e 39-vjeçares dhe 3 fëmijëve.
Gjatë kontrolleve, rreth orës 22:00 të datës 04.05.2024, në ujërat e lumit Buna, në fshatin Darragjat, u gjet trupi i pajetë i vajzës 9-vjeçare të shtetasve E. A. dhe A. A., e cila dyshohet se është vetëmbytur si pasojë e dhunës nga babai i saj.
Policia e Shkodrës, në drejtimin e Prokurorisë së Shkodrës, vijon intensivisht punën për gjetjen e 3 shtetasve të tjerë të larguar nga banesa, si dhe për zbardhjen dhe dokumentimin e rrethanave të këtij rasti.
Zhduket nëna me tre fëmijët, njëri prej fëmijëve gjendet i pajetë në lumë
Një ngjarje e rëndë raportohet të ketë ndodhur në Shkodër.
Një grua bashkë me tre fëmijet e saj të mitur, rezultojnë të zhdukur që disa ditë.
Sipas raportimit të mediave shqiptare, njëri nga fëmijet, i moshës tetëvjeçare, është gjetur nga një peshkatar në ujërat e Lumit Buna.
Ndërkohë dy fëmijët e tjerë dhe nëna shtetasja A.A ende janë të zhdukur.
Kërkimet po vazhdojnë nga zhytësit e forcave Renea.
Nga policia është ndaluar bashkëshorti, E. A i cili kishte deklaruar se kishte humbur kontaktet me familjen e tij.
Tutje, thuhet se fëmija që u gjet nga peshkatari në mënyrë rastësore një ditë më parë dyshohet se ka shenjë dëmtimi në pjesën e fytyrës.
Raportohet se fëmijët e mitur janë dy vajza dhe një djalë të moshës tetë, gjashtë dhe katër vjeç.
Janë ende të paqarta arsyet e kësaj ngjarje ndërsa policia dhe prokuroria kanë nisur hetimet duke marrë në pyetje familjarë të shtetases A.A, dhe bashkëshortit të saj të ndaluar nga policia nëse kanë dijeni për ngjarjen.