Veseli dhe Hoyt Yee pajtohen se është koha për vendime të mëdha

Ata u pajtuan që Demarkacioni të procedohet nga Qeveria për miratim në Kuvend javën tjetër

Kryetari i Kuvendit të Republikës së Kosovës, Kadri Veseli, ka zhvilluar një bisedë telefonike me Zëvendës/Ndihmës Sekretarin e SHBA-së, Hoyt Brian Yee, ku kanë diskutuar për zhvillimet politike në Kosovë dhe bashkëpunimin mes Kosovës dhe SHBA-së.

Diplomati amerikan Hoyt Yee e përgëzoi Veselin për lidershipin e treguar në vendimmarrje, me theks të veçantë e vlerësoi partneritetin që FSK të shndërrohet në ushtri në koordinim me Shtetet e Bashkuara të Amerikës.

Gjatë bisedës me diplomatin amerikan, Veseli u shpreh se institucionet e Kosovës duhet të marrin vendime të mëdha, sepse në të kundërtën, ato e humbin kuptimin.

Në këtë drejtim, ata u pajtuan që Demarkacioni të procedohet nga Qeveria për miratim në Kuvend javën tjetër.

Veseli dhe diplomati amerikan Hoyt Yee kanë biseduar edhe për reformat në drejtësi, të cilat duhet të vazhdojnë dhe të gjitha institucionet duhet të angazhohen që reforma në drejtësi të jetë një sukses.

Kryetari e ka falënderuar diplomatin për mbështetjen e vazhdueshme amerikane për Kosovën, ndërsa e ka ftuar atë për një vizitë tjetër në Kosovë.

Diplomatin amerikan e ka konfirmuar se do të rikthehet shumë shpejt për një vizitë në Kosovë./21Media