Memorandum bashkëpunimi me kompaninë "Ayyt Career"

Memorandum bashkëpunimi me kompaninë “Ayyt Career”

Ministri i Kulturës, Rinisë dhe Sportit, Kujtim Gashi ka nënshkruar sot memorandum bashkëpunimi me kompaninë “Ayyt Career” e përfaqësuar nga agjensioni “Alba Berisha Conulting”.

Sipas Gashit, qëllimi i nënshkrimit të këtij memorandumi është realizimi i punës profesionale praktike të të rinjve në formë të punësimit sezonal të tyre në Turqi.

“Me qëllim  të avancimit të të rinjve tanë dhe krijimit të kushteve për të punuar në punë praktike në fushën e hotelerisë, sot nënshkruam këtë marrëveshje nga e cila do të përfitojnë shumë të rinj të vendit tonë e të cilët përveç që do të paguhen për punën e tyre, do të kenë mundësi që të krijojnë përvoja të reja në këtë fushë në Turqi dhe punë për të cilën në fund edhe do të certifikohen. Kjo u mundëson atyre që të aftësohen profesionalisht në fushën e hotelerisë dhe të krijojnë kontakte të reja të nevojshme për ta”, ka thënë Gashi.

Ministria e Kulturës, Rinisë dhe Sportit përkrah këtë program me 15 mijë euro. “Këto mjete dedikohen për 50 të rinj përfitues duke llogaritur koston nga 300 euro për person”, ka njoftuar ai.

Sipas tij, përzgjedhja e studentëve përfitues për punë praktike gjashtë mujore në Turqi do të bëhet nga Ministria e Kulturës, Rinisë dhe Sportit.

“Nënshkrimi i kësaj marrëveshjeje nuk do të jetë e vetmja mënyrë për të angazhuar dhe për t’iu mundësuar të rinjve tanë punë praktike nga e cila do të aftësohen profesionalisht, sepse ne si Ministri, unë si ministër do të angazhohem maksimalisht që të rinjtë e vendit tonë paralelisht me studime të kenë mundësi pune nga e cila edhe certifikohen”, ka thënë Gashi.

Në anën tjetër, drejtoresha e agjensionit Albana Berisha, u shpreh e lumtur që kanë arritur ta nënshkruajnë këtë memorandum bashkëpunimi.