Nga kjo marrëveshje do të përfitojnë qytetarët dhe bizneset e të dyja vendeve

Nga kjo marrëveshje do të përfitojnë qytetarët dhe bizneset e të dyja vendeve

Ministri i Financave në detyrë, Bedri Hamza në kuadër të vizitës së tij zyrtare në Washington, së bashku me Ministrin e Financave të Arabisë Saudite, Mohammed Al-Jadaa, kanë nënshkruar Marrëveshjen për eliminimin e tatimit të dyfishtë ndërmjet Kosovës dhe Arabisë Saudite.

Sipas, Hamzës kjo marrëveshje do të jetë një akt ligjor që do të përfitojnë qytetarët dhe bizneset të të dyja vendeve, dhe njëherit është një mjet shtesë ligjor për të motivuar dhe përfituar investime të huaja në vendin tonë.

Gjatë vizitës në Washington, Hamza gjithashtu u takua edhe me zyrtarët e lartë të Fondit Monetarë Ndërkombëtarë dhe të Bankës Botërore, duke përfshirë takimin me zëvendësdrejtorin ekzekutiv të Fondit Monetar Ndërkombëtarë Tao Zhan, me zëvendësdrejtorin e Fondit Monetarë Ndërkombëtarë për Evropë Poul Thomsen, me zëvendësdrejtorin e bankës Botërore për Evropë dhe Azinë Qendrore Cyril Muller, si dhe me drejtoreshën e Bankës Botërore për Ballkanin Perëndimor Linda Van Gelder.

Me këtë rast Hamza i njoftoi përfaqësuesit e Fondit Monetar Ndërkombëtar dhe Bankës Botërore për stabilitetin makro-fiskal dhe zhvillim ekonomik të Kosovës, si dhe planet për të ardhmen.

Në komunikatën e Ministrisë së Financave, thuhet se zyrtarët e Fondit Monetar Ndërkombëtar dhe Bankës Botërore, e përgëzuan ministrin Bedri Hamza për progresin e deritanishëm financiar dhe ekonomik të Kosovës, që si rezultat i kësaj Republika e Kosovës tashmë është në top 20 reformatorët më të mëdhenj të Doing Business për këtë vit në raportin e Bankës Botërore.

Ata gjithashtu konfirmuan mbështetjen e mëtutjeshme për Ministrinë e Financave, por edhe për institucionet të tjera në vend”, përfundoi deklarata.