Mustafa: Ju lumtë Majlindë, Norë, trajner!
Kryeministri i Kosovës, Isa Mustafa i ka uruar Majlinda Kelmendin, Nora Gjakovën dhe trajnerin Driton Kuka, për suksesin e arritur sot në Kampionatin Evropian në Poloni.
“Mbretëresha e xhudos, Majlinda Kelmendi dhe Nora Gjakova i sollën vendit edhe dy trofe. Medalja e Artë e Majlindës dhe Medalja e Bronztë e fituar nga Nora në Kampionatin Evropian në Poloni e rikthyen Kosovën në majat e sportit evropian”, thuhet në postimin e Mustafës.
Kryeministri po ashtu ka thënë se Qeveria e Kosovës tashmë i ka siguruar buxhetin dhe projektin për ndërtimin e Palestrës Nacionale të Xhudos në Pejë, e cila do të fillojë të ndërtohet gjatë këtij viti, ku do të stërviten kampionet tona aktuale si dhe brezat e rinj të xhudistëve të Kosovës.
“Ju lumtë Majlindë, Norë, trajnerë dhe i gjithë ekipi ynë në Poloni”, thuhet në fund të postimit të kryeministrit./21Media