Pas “ditëve pranverore” po vjen i ftohti polar
Reshje bore dhe erëra
Nga Atlantiku verior cikloni “Ottilia” po depërton mbi Evropën qendrore, kur pritet formimi i një cikloni të dytë të fuqishëm me emrin “Petra”, që me shpejtësi do të depërtojë edhe nga rajoni ynë.
Dita e sotme fillon me mot të butë mirëpo orëve të pasdites do të fillojë të fryjë erë jugperëndimore, e priten edhe reshje shiu, që do të përfshijnë gjithë vendin deri në mbrëmje.
Me kalimin e frontit të ftohtë era do të ndryshojë drejtimin nga krahu verior, ndërsa reshjet e shiut do të shndërrohen në reshje bore, të cilat do të vazhdojnë edhe gjatë ditës së mërkurë, e vende-vende deri të enjten në mëngjes.
Për shkak të diferencave të mëdha barike, të martën mbrëma dhe të mërkurën priten edhe erëra të fuqishme me hove deri në 20m/s.
Erërat dhe reshjet që priten këtyre ditëve do të shpërndajnë ndotësit, e vlerat e cilësisë së ajrit do të zbresin në të mira dhe mesatare.