Thaçi: Krenar me luftën, të gatshëm për paqe!

“Jam shumë krenar për të kaluarën time dhe të bashkëluftëtarëve të mi”

Presidenti i Kosovës, Hashim Thaçi, sonte në Këshillin e Sigurimit të OKB-së, ka lavdëruar punën e kësaj organizate shumë kombëshe, duke thënë se “kurrë nuk do të harroj që në ditët më të rënda për mua dhe qytetarët e Kosovës, nga ky forum jehuan zëra shprese dhe thirrje për paqe. Unë dhe populli im kurrë nuk do të harrojmë se kur po përballeshim me momentet më të rënda për ne, ju u shndërruat në zërin tonë”.

Presidenti Thaçi u ka thënë shteteve anëtare të Kombeve të Bashkuara se falë tyre u mësua për dhunën sistematike, spastrimin etnik, mijëra qytetarë të pafajshëm që sot nuk janë më në mesin tonë, mijëra që ende janë të zhdukur, dhe për mbi 20.000 gra që ende jetojnë me dhimbjen dhe stigmën e dhunës seksuale të përjetuar gjatë luftës, nga Serbia.

“Ju ishit zëri ynë, kur ne na mungonte një i tillë. Por, ne sot ndodhemi këtu 2 dekada pas luftës së përgjakshme dhe mbi 10 vite pas pavarësisë së Kosovës. Jemi të thirrur në një seancë të jashtëzakonshme në kohën e një situate krejt normale dhe progresi substancial në Kosovë. Kur angazhimi i misionit të Kombeve të Bashkuara në Kosovë kërkon rishqyrtim serioz dhe vëmendja e juaj është e nevojshme për të adresuar probleme te vërteta me të cilat përballet bota sot”, ka thënë Thaçi.

Presidenti i Kosovës ka thënë në Këshill të Sigurimit para shteteve anëtare të Kombeve të Bashkuara, se asgjë e jashtëzakonshme nuk ka ndodhur në Kosovë javën e kaluar.

Sipas presidentit Thaçi, ajo që ka ndodhur është një vendim krejt normal, i drejtë në mision dhe qëllim.

“Nëse Kosova ka bërë gabim është sepse ka pritur pesë vite pa nevojë për themelimin e ushtrisë. Vendimi për ushtrinë është i vonuar e assesi i gabuar. Është i vonuar sepse kemi pritur, vullnet të mirë nga ata që kurrë deri më sot, nuk e treguan në raport me shtetin e Kosovës. Por tani, Republika e Kosovës, si shtet sovran dhe i pavarur, ka ndërmarrë një hap të natyrshëm për themelimin e ushtrisë së saj. Më thoni ju lutem çka ka të jashtëzakonshme këtu? Nuk ka asgjë të jashtëzakonshme, asgjë fare, që është në kundërshtim me Rezolutën 1244, pakon e presidentit Ahtisari, Kushtetutën e Kosovës, apo të drejtën ndërkombëtare”, ka thënë Thaçi.

Pikë së pari, Thaçi ka thënë se Rezoluta 1244, përkatësisht paragrafi 15, i referohet vetëm demilitarizimit të UÇK-së, proces ky i përmbyllur në kohë rekorde dhe pa asnjë incident në shtator të vitit 1999, si dhe i vlerësuar lartë edhe nga Këshilli i Sigurimit dhe Sekretari i atëhershëm Kofi Annan.

“Ishte vlerësuar lart edhe nga NATO dhe kjo mbështetet nga dëshmitë dhe raportet ekzistuese të NATO-s, por edhe të UNMIK-ut në atë kohë”, ka thënë Thaçi.

Së dyti, sipas tij, pakoja gjithëpërfshirëse e presidentit Ahtisari, i cili ishte edhe i dërguari i posaçëm i Sekretarit të Përgjithshëm të KB-së për negociata lidhur me statusin final të Kosovë, në nenin 52 nënvizon qartë të drejtën e Kosovës për të pasur ushtri.

“Për më tepër, rishikimi i sektorit të sigurisë, i realizuar në bashkëpunim të ngushtë me NATO-n, thekson shumë qartë të drejtën e Kosovës për transformimin e FSK-së në ushtri. Dhe në fund fare, vijon më e rëndësishmja, vendimi i Gjykatës Ndërkombëtare të Drejtësisë, që duhet theksuar se është marrë me kërkesën e shtetit serb, nënvizon qartë si loti se Kosova nuk ka shkelur të drejtën ndërkombëtare me shpalljen e pavarësisë së saj. Dhe rrjedhimisht, është e drejtë e pakontestueshme e Kosovës që të ketë ushtrinë e saj”, ka thënë Thaçi.

Themelimi i ushtrisë, sipas presidentit Thaçi, është vullnet i qytetarëve të Kosovës me mbështetje unanime politike nga të zgjedhurit e popullit, pavarësisht nëse i pëlqen kjo dikujt apo jo.

“Shteti i Serbisë është paraqitur i zemëruar. Por, jo edhe qytetarët serbë të Kosovës”, ka thënë Thaçi.

Thaçi ka thënë se si President i Republikës së Kosovës dhe si Komandant Suprem dëshiron ta thotë troç se ushtria e Kosovës do të sjellë më shumë paqe dhe stabilitet.

“Transformimi i misionit të FSK-së nuk është një hap të cilin e kemi ndërmarrë si mesazh kundër askujt. Ushtria e Kosovës nuk është dhe nuk do të jetë kërcënim kundër askujt. Ushtria e Kosovës është dhe do të mbetet profesionale dhe shumetnike. Mbi 10 për qind të ushtarëve janë nga komunitetet jo-shumicë. Serbë, malazezë, kroatë, turq, boshnjakë, romë, egjiptas, ashkalinj, etj. Një forcë e cila do të mbrojë çdo qytetar të Kosovës, në gjithë territorin e Kosovës. Çdo fëmijë, çdo të ri, çdo të re, pavarësisht gjuhës që ata flasin në shtëpi”, ka thënë Thaçi.

“Populli im, për shkak të së kaluarës së hidhur, gjithnjë ka pasur frikë nga uniforma ushtarake, pikërisht pasi ajo historikisht ka qenë e huaj dhe ka qenë simbol represioni. Por, ushtarët e Kosovës do të jenë ushtarë të paqes dhe ushtria e Kosovës do të jetë kontribuuese e stabilitetit në rajon”, ka shtuar ai.

Kreu i shtetit ka thënë se i vjen keq që disa qytetarë serbë të Kosovës, pjesëtarë të FSK-së, janë detyruar dhunshëm të japin dorëheqje si rezultat i presionit sistematik të ushtruar mbi ta nga shteti i Serbisë.

“Për mua kanë qenë rrëqethëse rrëfimet e disa ushtarëve nga komuniteti serb për intimidimin që u është bërë nga shteti i Serbisë. Familjet e tyre janë sulmuar. Shtëpitë u janë goditur me granata. Dhe shumë prej tyre janë mbajtur me orë të tëra nga policia e Serbisë kur kanë udhëtuar në Serbi. Kjo është vërtetë e tmerrshme. Më vjen shumë keq për ta, sepse e di që shumica dërrmuese e tyre e kanë dorëzuar uniformën e tyre me lot në sy dhe me zemër të thyer. Por, unë dua t’ju garantoj të gjithëve se ne nuk do të zmbrapsemi asnjëherë nga përpjekja jonë për të përfshirë edhe më shumë të gjitha komunitetet në ushtrinë e Kosovës. Kjo është ushtri, e cila do të ju shërbej të gjithë qytetarëve të Kosovës pa dallim. Kërcënimi i vetëm që i vjen rajonit janë thirrjet jo-racionale për luftë dhe konflikt që burojnë nga fqinji ynë verior”, ka thënë Thaçi.

Gjithashtu, Thaçi i ka siguruar shtetet anëtare të Kombeve të Bashkuara se Kosova do të respektojë të gjitha marrëveshjet ekzistuese ndërkombëtare, përfshirë letrën dërguar Sekretarit të Përgjithshëm të NATO-s për bashkëpunim me KFOR-in.

“Ne do të vazhdojmë të bashkëpunojmë ngushtë me NATO-n. E gjithë puna jonë do të jetë e koordinuar me NATO-n. Themelimi i ushtrisë së Kosovës nuk duhet perceptuar asnjëherë si një përpjekje për të dyfishuar misionin e NATO-s në Kosovë. Përkundrazi, vendimi i Kuvendit të Kosovës për themelimin e ushtrisë është në funksion të drejtpërdrejtë të ndërtimit të mekanizmave të cilët do ta bënin vendin tonë të aftë për të kontribuar në sigurinë lokale dhe më gjerë. Qëllimi jonë është që të zhvendosim paradigmën nga një vend i cili ka qenë konsumues i sigurisë dhe të bëhemi kontribuues i paqes dhe stabilitetit. Por kjo në asnjë mënyrë nuk ndërhyn me misionin aktual të NATO-së në Kosovë. Përkundrazi, Ushtria e Kosovës vetëm do ta ndihmojë dhe plotësojë atë. KFOR edhe sot, pas 20 vitesh, shihet si mision shpëtimtar. Qytetarët e vendit tim i respektojnë pjesëtarët e NATO-s si heronj. Ende u dhurojnë lule . Dhe përjetë do t’u jenë falënderues”, ka thënë Thaçi.

Thaçi ka thënë se është krenar që është presidenti i vendit më pro NATO-s dhe më pro BE-s në botë.

“Pavarësisht vështirësive dhe pavarësisht padrejtësive që po na bëhen, posaçërisht në procesin e liberalizimit të vizave, ne si vend qëndrojmë të palëkundur në orientimin tonë. Nuk kemi dhe as nuk kërkojmë alternativë tjetër, rrugë tjetër. E ardhmja e Kosovës dhe e ardhmja e rajonit tonë është në strukturat Euro-Atlantike. Andaj, të nderuar të pranishëm, kjo pashmangshëm na shpie tek esenca e çështjes në fjalë”, ka thënë ai.

Problemi të cilin kanë fqinjët tanë verior sot nuk është ushtria e Kosovës, ka thënë Thaçi, por ekzistenca e Kosovës si shtet i pavarur dhe sovran.

“Këto rrethana e bëjnë dialogun ndërmjet dy vendeve tona proces kyç. Pa dialog dhe pa marrëveshje finale, ne shndërrohemi në vende që prodhojnë drama të pafund dhe të panevojshme për konsum të brendshëm elektoral. Por të dëmshëm për të ardhmen e vendeve tona”, ka thënë Thaçi.

Ju lutem, ka shtuar Thaçi, vetëm hidhni një sy fushatës së ndyrë që Serbia udhëhoqi kundër anëtarësimit të Kosovës në INTERPOL.

“Më thoni ju lutem kush përfiton nga mosanëtarësimi i Kosovës në këtë organizatë? Përfiton vetëm krimi i organizuar. Përfiton terrorizmi. A thoni që unë duhet ta denigroj tani këtë forum duke përdorur gjuhën dhe metodat e përdorura nga Serbia kundër Kosovës? Të them të drejtën, unë sinqerisht ndjej keqardhje për sjelljen e tyre. Është më se e natyrshme që një sjellje e tillë të pasohet me masa të marra nga institucionet e Kosovës për produktet serbe të cilat hyjnë në Kosovë. Pra, Kosova nuk e ka provokuar këtë situatë. Ky reaksion është pasojë e veprimeve agresore të Serbisë. Unë dua të besoj që kjo gjendje do të tejkalohet në një të ardhmen e afërt. Prishtina dhe Brukseli janë duke komunikuar intensivisht për këtë çështje”, ka thënë ai.

Presidenti Thaçi ka thënë se Kosova mbetet e vendosur për paqe dhe dialog me Serbinë. Për këtë qëllim, ai ka thënë se Kuvendi i Kosovës javën e kaluar miratoi rezolutën për dialog dhe strukturën e ekipit negociator, me përfshirje pozitë-opozitë dhe shoqëri civile.

“Për sa kohë që ne nuk kemi një marrëveshje përfundimtare dhe të implementueshme, situatat e tilla do të përsëriten vazhdimisht. Unë dhe populli i Kosovës nuk e mbështesim konfliktin. Në fakt, ne asnjëherë në historinë tonë nuk e kemi shkaktuar asnjë konflikt. Gjithmonë kemi qenë viktimë. Gjithmonë kemi luftuar për mbijetesë. Paqja nuk nënkupton mungesën e mospajtimeve, por ky cikël i dhunshëm duhet të marrë fund. Andaj, është detyra e gjeneratës sime që të lëmë pas një rajon pa konflikte, një rajon në paqe të qëndrueshme. Një Ballkan funksional në të cilin Kosova dhe Serbia, si dy vende të pavarura, aspirojnë të ardhmen evropiane”, ka thënë Thaçi.

Ai ka shtuar se e di shumë mirë se ndërtimi i paqes për liderët është shumë më sfidues e madje edhe më i rrezikshëm sesa të bërit e luftës, por paqja është detyrimi ynë ndaj fëmijëve tanë dhe ndaj brezave që pasojnë.

“Atyre ua kemi borxh një të ardhme pa konflikte. Kosova është gati. Ne jemi gati për dialog. Ne jemi gati për vendime të vështira. Por edhe jemi njëkohësisht të vetëdijshëm se nëse nuk e shfrytëzojmë këtë moment historik, do të pësojnë të gjitha palët e përfshira”, ka thënë Thaçi.

Thaçi ka thënë se dy dekada më parë, në një ditë të rëndomtë si kjo, kam qenë në uniformë, duke luftuar kundër regjimit të Slobodan Milosheviqit.

“Jam shumë krenar për të kaluarën time dhe të bashkëluftëtarëve të mi. Sot si president i shtetit të pavarur të Kosovës, jam i vetëdijshëm që kam përpara edhe një sfidë tjetër të madhe. Betejën për ardhmërinë tonë. Betejën për paqen. Betejën për të përmbyllur një konflikt shekullor mes dy popujve tanë. E di që nuk do të jetë aspak e lehtë. E di se marrëveshjet e kësaj natyre nuk janë shumë popullore. Por ato janë të domosdoshme. Unë besoj thellësisht se një marrëveshje e tillë do të kishte fuqi transformuese në rajonin tonë. Një marrëveshje e tillë do të ndryshonte prioritetet. Askush më nuk do të mund të fitonte vota duke nxitur urrejtje. Askush nuk do të mund të materializonte frikën. Një marrëveshje gjithëpërfshirëse do t’i hapte derën një lidershipi të ri që synim kryesor do ta kishte reformat dhe zhvillimin”, ka thënë Thaçi.

Presidenti i Kosovës ka thënë se beson plotësisht në një të ardhme ku Kosova dhe Serbia ulen si të barabarta në tryezën e familjes evropiane.

“Unë besojë në një të ardhme ku ushtarët e Kosovës dhe ata të Serbisë shërbejnë përkrah njëri-tjetrit në misione paqeruajtëse anë e kënd botës. Unë besoj në një të ardhme të tillë, sepse e kam përjetuar të pamundurën, të pabesueshmen, e cila ka ndodhur para syve të mi.  Unë frymëzohem çdo ditë nga sportistët kosovarë të cilët na mësojnë se kthimi është i mundshëm edhe pas dështimit, se flamuri ynë mund të ngrihet edhe në vende që nuk e kanë njohur ende shtetin tonë. Frymëzohem nga gazetarët të cilët më kritikojnë çdo ditë dhe më bëjnë President më të mirë të vendit tim. Frymëzohem nga qytetarët e Kosovës që përkundër dhimbjeve që kanë vuajtur, rrënimeve dhe humbjeve, asnjëherë nuk kanë hequr dorë nga vlerat dhe parimet dhe ende këmbëngulin në liri, barazi, drejtësi e dinjitet”, ka thënë ai.

Thaçi ka pohuar se beson në një të ardhme evropiane për Kosovën dhe rajonin tonë.

“Një të ardhme pa intriga, konflikte dhe urrejtje. Mbetet në dorën tonë që ta jetësojmë këtë të ardhme. Shpejt, në javët dhe muajt e ardhshëm. Me një marrëveshje paqësore finale Kosovë-Serbi, ligjërisht obliguese, pa kufinjë në baza etnike, pa shkëmbim popullatash, por, me njohje reciproke si vende të pavarura e sovrane e shtete me shoqëri shumetnike”, ka thënë ai.