Rasti Ivanoviq, vazhdohet për dy muaj masa e paraqitjes në polici për tre të dyshuar
Gjykata Themelore në Prishtinë, Departamenti Special ka vazhduar masën e paraqitjes së detyrueshme në polici edhe për dy muaj Dragisha Markoviq, Silvana Arsoviq dhe Zharko Jovanoviq, të cilët dyshohen se u kanë ndihmuar autorëve me veprimet e tyre në kryerje të vrasjes së politikanit serb, Oliver Ivanoviq.
Kjo është konfirmuar për kp nga avokati i këtij rasti Musa Damati.
“Klientja ime Silvana Arsoviq, me rolin e saj si asistente e partisë, dyshohet se përmes kamerave ka ofruar ndihmë në veprën penale, dhe në këtë fazë të procedurës penale konsideroj se është sukses i mbrojtjes që masat tjera të propozuara nga Prokuroria Speciale e Kosovës janë refuzuar për klienten time, dhe se gjykata ka aprovuar kërkesën e mbrojtjes duke e vazhduar vetëm masën për paraqitje në polici të klientes sime”, ka deklaruar Damati.
Oliver Ivanoviq, lideri i Partisë Liri, Demokraci dhe Barazi është qëlluar për vdekje më 16 janar 2018 në pjesën veriore të qytetit të Mitrovicës. Policia dyshon se një makinë e gjendur e djegur në një tjetër rrugë të Mitrovicës është përdorur nga autorët e krimit, e më pas është djegur për të humbur gjurmët. Në nëntor 2019, Policia e Kosovës ka arrestuar tre persona në veri të Mitrovicës, të cilët dyshohet se kanë lidhje me vrasjen e Ivanoviqit. /kp