11 foshnje vdiqën si pasojë e zjarrit në Senegal

Njëmbëdhjetë foshnje të porsalindura vdiqën nga një zjarr në njësinë e maternitetit të një spitali në qytetin perëndimor të Tivaouane në Senegal. Sipas kryebashkiakutë qytetit, Demba Diop Sy, tri foshnja u shpëtuan nga zjarri.
Tragjedia shkaktoi një valë pikëllimi dhe zemërimi në të gjithë Senegalin për gjendjen e mjeruar në disa nga objektet e kujdesit shëndetësor të vendit.
Familjet nxituan në spitalin Mame Abdou Aziz Sy Dabakh për të zbuluar nëse foshnjat e tyre mbijetuan. Disa mund të shiheshin të ulur jashtë të përlotur me kokën në duar, të pushtuar nga lajmi se foshnjet e tyre ishin mes të vdekurve.
“Ne jemi të shkatërruar”, i tha BBC-së një i ri.
“Kunata ime ka lindur muajin e kaluar por më pas ka vdekur. Fëmija ka lindur shtatë muaj pas shtatzënisë, ndaj është dashur të mjekohet dhe tani është një nga viktimat e këtij zjarri”, tha ai.
Moustapha Cissé i tha agjencisë së lajmeve Reuters se nipi i tij trejavor, Mohamed, ishte në mesin e të vdekurve.
Nëna e tij, Ramata Gueye gjithashtu vdiq pas lindjes. Ajo dhe bashkëshorti i saj, El Hadj Gueye, ishin përpjekur për një fëmijë për shtatë vjet dhe Mohamed ishte fëmija i tyre i vetëm.
“Është zemërthyese ta shohësh atë të humbasë gruan dhe tani fëmijën e tij”, tha Cissé. “Nuk mund ta shikoj as në sy”.
“A është plani i Zotit apo është thjesht se spitalet e Senegalit po dështojnë? Ne duhet t’ia bëjmë këtë pyetje qeverisë”, shtoi ai.
Spitali ishte inauguruar rishtazi, sipas AFP, duke cituar raportet e mediave lokale.

Presidenti Macky Sall shpalli tre ditë zie kombëtare. Ai shprehu ngushëllime për vdekjen e foshnjeve.
“Dëgjova lajmin për zjarrin mbrëmë, por nuk ia tregova vajzës sime. Prita deri në mëngjes për ta informuar”, tha Ndeye Absa Gueye, e cila më vonë zbuloi se ndër të vdekurit ishte edhe nipi i saj.
“Kjo situatë është shumë për të ardhur keq dhe jashtëzakonisht e dhimbshme”, tha Ministri i Shëndetësisë Abdoulaye Diouf Sarr nga Gjeneva, ku po merrte pjesë në një takim të Organizatës Botërore të Shëndetësisë.
Ai tha se një hetim ishte duke u zhvilluar dhe ai do të shkurtonte udhëtimin e tij për t’u kthyer menjëherë në Senegal.
Shumë vëzhgues thanë se sistemi shëndetësor i Senegalit është i rrethuar nga problemet e stafit, infrastrukturës, pajisjeve dhe financimit.
Grupi i të drejtave Amnesty International i kërkoi qeverisë të krijojë një “komision të pavarur hetimor për të përcaktuar përgjegjësinë dhe për të ndëshkuar fajtorët”.
Amnesty bëri thirrje që të gjitha repartet neonatale të Senegalit të inspektohen pasi një incident i ngjashëm ka ndodhur në qytetin verior të Linguère vitin e kaluar.
Katër foshnja të porsalindura kanë vdekur atje pasi një zjarr ka shpërthyer në repartin e maternitetit të një spitali. Në atë kohë, kryebashkiaku ka thënë se ka pasur një defekt elektrik në njësinë e ajrit të kondicionuar të maternitetit.
Tragjedia e së mërkurës pason gjithashtu një protestë kombëtare për vdekjen e një gruaje në lindje, Astou Sokhna, e cila vdiq ndërsa thuhet se lypte për një prerje cezariane gjatë provës së saj të lindjes 20-orëshe. Edhe fëmija i saj i palindur vdiq./21Media