Incidentet me dron, shqetësim për përhapje të konfliktit në shtetet e NATO-s
Javën e kaluar, një dron fluturoi më shumë se 350 milje përtej kufirit perëndimor të Ukrainës përpara se të rrëzohej në Kroaci, një vend anëtar i NATO-s. Droni mbante një bombë, sipas zyrtarëve kroatë dhe ende nuk është e qartë nëse i përkiste forcave ukrainase apo ruse.
Një tjetër dron ka hyrë së fundmi në hapësirën ajrore të Rumanisë, në jug të Ukrainës. Të martën, ushtria e Ukrainës tha se rrëzoi një dron rus që kishte hyrë përsëri në Ukrainë përmes hapësirës ajrore polake.
Treshja e incidenteve me dron ka përforcuar shqetësimet se lufta e Rusisë në Ukrainë mund të përhapet në vendet e NATO-s, edhe nëse pa dashje, duke e detyruar aleancën të vendosë se si të përgjigjet ndaj incidenteve që ndodhin brenda kufijve të saj.
Zyrtarët amerikanë të mbrojtjes kanë thënë se dronët e gabuar që hynë në territorin e NATO-s dukeshin se ishin kryesisht të paqëllimshëm. Që nga fillimi i pushtimit rus, ushtria amerikane ka krijuar një linjë dekonflikti me Rusinë për të zvogëluar rrezikun e llogaritjes së gabuar dhe për t’u siguruar që dy ushtritë që veprojnë kaq afër njëra-tjetrës të mos përplasen pa dashje.
NATO është përpjekur pa sukses të lidhet me Rusinë përmes një linje telefonike kundër konfliktit dhe letrave të shkruara, duke ngritur shqetësime për gatishmërinë e Rusisë për t’u angazhuar pasi pushtimi i Ukrainës është përhapur më në perëndim drejt territorit të NATO-s, thanë të mërkurën zyrtarë të lartë ushtarakë të NATO-s.
“Ne po përpiqemi të komunikojmë me ta sigurisht,” u tha një nga zyrtarët gazetarëve në një konferencë në selinë e NATO-s.
Rusia e afroi luftën më afër pragut të NATO-s fundjavën e kaluar me sulme me raketa të drejtuara me saktësi pranë Lviv në Ukrainën perëndimore, duke synuar një strukturë stërvitore ushtarake te kufiri i Polonisë.
Këto sulme erdhën një ditë pasi zyrtarët rusë kërcënuan autokolonat që po i ofrojnë armë Ukrainës nga Perëndimi, megjithëse një zyrtar i lartë i mbrojtjes amerikane tha se objekti nuk po përdorej për dërgesat e sigurisë./21Media