Raketat ruse godasin magazinat e grurit në Odesa

Raketat ruse goditën magazinat e grurit në Odesa gjatë natës, duke shkatërruar tonelata të korra në depo, ndërsa forcat e Moskës shënjestruan qytetin port jugor për natën e katërt radhazi, tha një zyrtar ushtarak ukrainas.

Në një postim në Telegram të premten, Oleh Kiper, kreu i administratës ushtarake rajonale të Odesës, tha se sulmet u kryen me raketa Kalibr të lëshuara nga Deti i Zi.

“Për fat të keq, ka goditje në terminalet e grurit të një ndërmarrje bujqësore në rajonin e Odesa. Armiku shkatërroi 100 ton bizele dhe 20 ton elb,” tha ai.

Dy persona u plagosën gjatë sulmeve.

Sulmet e vazhdueshme të Rusisë në Odesa këtë javë vijnë pasi Moska u tërhoq nga një marrëveshje kritike e drithit që u mundësoi eksporteve të grurit ukrainas një rrugë të sigurt për të dalë nga portet e vendit të Detit të Zi. Sekretari i Përgjithshëm i OKB-së ka paralajmëruar se sulmet ndaj qyteteve port do të kenë një ndikim “përtej Ukrainës” kur bëhet fjalë për çmimet e ushqimeve.

Matthew Hollingworth, përfaqësuesi i Programit Botëror të Ushqimit të OKB-së për Ukrainën, i tha CNN të enjten se nga 33 milionë tonë ushqime që u dërguan nga Ukraina nëpërmjet nismës së grurit që nga korriku i kaluar, 20% shkuan në Jugun Global. Rreth 725,000 tonë ushqim u furnizuan njerëzve që jetonin në vendet që “kanë nevojë dëshpërimisht për atë ndihmë ushqimore”, duke përfshirë Afganistanin, Jemenin, Etiopinë, Somalinë dhe Sudanin.

Moska ka thënë se sulmet në Odesa janë hakmarrje ndaj një sulmi ukrainas të hënën në urën që lidh Krimenë e pushtuar me Rusinë./21Media

NDIQNI PJESËT MË INTERESANTE TË PROGRAMIT TË RTV21, DUKE BËRË LIKE KËTË FAQE – 21 MEDIA