Alarm për bombë në avionin e linjës Varshavë-Zyrih, policia blindon aeroportin

Një operacion i madh policor është ndërmarrë në aeroportin e Zyrihut në Zvicër. Sipas Blick, ka informacion se janë marrë kërcënime për bombë në fluturimin e Helvetic Airways (LX1343) nga Varshava në Zyrih.
“Aeroplani Embraer E190-E2 u ul në pistën 14 në aeroportin e Zyrihut pa incidente. Pak para orës 12:00, pasagjerët dhe ekuipazhi u larguan nga avioni përmes shkallëve”, tha një zëdhënës i Helvetic Airways kur u pyet nga Blick.
Së bashku me autoritetet, Helvetic Airways po merr të gjitha masat e nevojshme dhe të mundshme për të garantuar sigurinë dhe mirëqenien e pasagjerëve dhe anëtarëve të ekuipazhit. Linja ajrore është në kontakt të vazhdueshëm me autoritetet e përfshira, policinë dhe aeroportin./TV21