Arrestohen 5 persona në Ferizaj

Policia e Kosovës ka arrestuar pesë persona në Ferizaj, pasi ata kanë penguar punën e policëve që po kryenin detyrën e tyre zyrtare në një lokal që nuk ka respektuar orarin e punës dhe masat antiCOVID.
“Stacioni policor në Ferizaj nga Drejtoria Rajonale e Policisë në Ferizaj, në orët e para të mëngjesit në ora 00:30 ka pranuar një informacion se në fshatin Gërlic të Ferizajt një lokal nate është duke punuar në kundërshtim me vendimet Qeverisë së Republikës për masat COVID-19. Në lidhje me këtë, policia e rendit së bashku me Inspektorët e AUV-ut të mbështetur edhe nga Njësia e Reagimit të Shpejtë (NJRSH ) kanë marr veprimet e nevojshme dhe menjëherë kanë dalë në këtë lokacion dhe aty, edhe përkundër masave COVID-19 ai lokal ishte i hapur duke punuar dhe brenda ishin disa persona. Gjatë kryerjes së detyrave zyrtare policia dhe inspektorët kanë hasur në rezistencë duke u kanosur nga një person dhe duke u penguar nga disa të tjerë. Edhe përkundër përpjekjeve të policisë që të kryejnë detyrat e tyre zyrtare, të detyruar nga veprimet e pesë ( 5) personave që në mënyrë aktive kanë penguar punën e policisë, të njëjtit persona i kanë arrestuar dhe shoqëruar në stacionin policor në Ferizajt, ndërsa të gjithë personave tjerë që ishin aty pesëmbëdhjetë(15) u janë shqiptuar gjoba për mos respektim të orarit të lëvizjes”, thuhet në njoftim.
Me vendim të prokurorit të Prokurorisë Themelore në Ferizaj, të dyshuari me inicialet H.S (M/K) 52 vjeçar i është caktuar masa e ndalimit për 48 orë, ndërsa 4 personat tjerë janë liruar për procedurë të rregullt.
“Ky rast iu ka referuar Sektorit Rajonal të Hetimeve për procedura të mëtejme hetimore”, thuhet tutje në njoftim./21Media