Arrestohet një i dyshuar për trafikim me lëndë narkotike

Është arrestuar dje një i dyshuar për trafikim me lëndë narkotike.
Hetuesit policorë nga Njësia e Drejtorisë për Hetimin e Trafikimit me Narkotik- Prishtinë, pasi kanë pranuar një informatë se një person dyshohet se posedon lëndë narkotike, kanë njoftuar prokurorin dhe kanë filluar hetimet.
“Më, 09.09.2022, hetuesit policorë, kanë identifikuar Z.K., (viti i lindjes 1986, mashkull kosovar), kanë ndaluar të njëjtin, gjatë kontrollit i janë gjetur dy qese të vogla (0.8 gr.) me lëndë që dyshohet të jetë kokainë, 190 euro (dyshohet te fituara nga vepra penale) dhe një telefon”, bëhet e ditur në njoftimin e Policisë së Kosovës.
Policia ka kontrolluar edhe banesën e të dyshuarit të lartcekur. Në banesë, policia ka gjetur dhe sekuestruar edhe gjashtë qese të vogla me peshë 27.3 gr., po ashtu dyshohet të jetë kokainë, 160 euro (dyshohet te fituara nga vepra penale) dhe një peshore digjitale.
Në konsultim me prokurorin iniciohet rasti “blerja, posedimi, shpërndarja dhe shitja e paautorizuar e narkotikeve, substancave psikotrope dhe analoge”. I dyshuari intervistohet dhe me aktvendim nga prokurori dërgohet në mbajtje deri në 48 orë./21Media