Basha: Dhjetëra gazetarë dhe intelektualë iu bashkuan “Sheshit të Lirisë”

“Plani i republikës së vjetër është të ruajë me çdo kusht gjendjen e tanishme”

Kryetari i Partisë Demokratike, Lulzim Basha ka deklaruar se dhjetëra gazetarë dhe intelektualë të fjalës, iu bashkuan sot “Sheshit të Lirisë”, për të ndarë shqetësimin për shtypjen e fjalës së lirë dhe nënshtrimin e mediave ndaj pushtetit.

“Me dhjetra gazetarë dhe intelektualë të fjalës iu bashkuan sot Sheshit të Lirisë për të ndarë shqetësimin për shtypjen e fjalës së lirë dhe nënshtrimin e mediave ndaj pushtetit. Agim Doçi, Bledi Kasmi, Klara Bici, Elton Metaj, Mina Hysa, Altin Mema, Gazim Alliu, Artan Cena e të tjerë sollën përpjekjet e tyre të përditshme për t’i bërë ballë trysnisë së pushtetit për t’u kthyer në megafon të qeverisë, duke braktisur të vërtetën dhe interesin publik. Dhjetra studentë shprehën, gjithashtu, dëshpërimin e tyre për mungesën e lirisë dhe të mundësive, por edhe kurajon për të luftuar për të ardhmen e tyre dhe të Shqipërisë.

Plani i republikës së vjetër është të ruajë me çdo kusht gjendjen e tanishme. Me milionat e drogës, koncesioneve dhe tenderave po u mbyllet goja mediave dhe po mbulohet e vërteta. Sepse vetëm kështu, Edi Rama dhe klientët e tij mund të jenë zotër të parave të shqiptarëve, të pasurive të shqiptarëve, të mediave, të mendjeve dhe fatit të shqiptarëve.

Detyra jonë është e qartë, ta ndalim këtë tirani. Qeverisja duke shkelur lirinë dhe të drejtat njerëzore dhe politike është tirani dhe tiranitë ndalen ose përmbysen. Shteti i vjetër nuk do t’i mbijetojë as orës së parë të Republikës së Re që po vjen me zgjedhjet e lira dhe të ndershme. Kjo Republikë do të garantojë lirinë dhe mundësitë e barabartë për të gjithë dhe do të kufizojë pushtetin e çdo kujt”, ka shkruar Basha.