BBC: Serbia vendos trupat në gatishmëri të lartë për tensionet në Kosovë

Edhe media britanike BBC, ka raportuar se ushtria serbe thotë se është në “nivelin e saj më të lartë të gatishmërisë luftarake” pas javësh të përshkallëzimit të tensioneve midis Serbisë dhe Kosovës.
Presidenti serb, Aleksandar Vuçiq thotë se do të “marr të gjitha masat për të mbrojtur popullin tonë dhe për të ruajtur Serbinë”.
Sipas pretendimeve të mediave serbe “Prishtina po përgatit “një sulm” ndaj zonave etnike serbe në veri të Kosovës”.
Qeveria e Kosovës nuk ka bërë asnjë koment lidhur me këto akuza.
Por më parë ka akuzuar Vuçiqin se po luan “lojëra” për të nxitur telashe.
Bashkimi Evropian (BE) është përpjekur të ndërmjetësojë.
Blloku prej 27 anëtarësh po bën thirrje për “përmbajtje maksimale dhe veprim të menjëhershëm” dhe që krerët e Serbisë dhe Kosovës “të kontribuojnë personalisht për një zgjidhje politike”.
Serbia refuzon ta njohë Kosovën si shtet të pavarur.
NATO, e cila ka trupa paqeruajtëse në Kosovë, u ka bërë thirrje të gjitha palëve që të shmangin provokimet. BE-ja ka paralajmëruar se nuk do të tolerojë sulme ndaj policisë së BE-së ose akte kriminale./21Media