Biden nënshkruan urdhërat ekzekutivë kundër koronavirusit

 

 

Joe Biden, president i Shteteve të Bashkuara të Amerikës, e ka bërë luftën kundër koronavirusit prioritetin e tij kryesor, ai nënshkroi një mori urdhrash ekzekutivë, derisa shpalosi një strategji kombëtare kundër pandemisë.

Dhjetë urdhrat, mes tjerash, synojnë t’i japin hov programit të vaksinimit, të zgjerojnë testimin dhe veshjen e maskave, si dhe të rrisin mbledhjen dhe analizimin e të dhënave, që do të ndihmonin në krijimin e politikave.

Udhëtarët nga jashtë do të duhet të kenë test negativ kundër koronavirusit dhe të futen në karantinë pas mbërritjes në SHBA.

Biden po ashtu i udhëzoi agjencitë të përdorin Aktin e Prodhimit të Mbrojtjes – një kompetencë kjo e kohës së luftës, që e lejon qeverinë të udhëzojë industrinë për të prodhuar furnizime të nevojshme në kohë të emergjencës kombëtare.

“Kjo është një ndërmarrje e kohës së luftës”, tha Biden derisa nënshkroi urdhrat në Shtëpinë e Bardhë.

Tutje ai shtoi se “Plani ynë nis me një fushatë agresive, të sigurt dhe efektive të vaksinimit, që synon përmbushjen e qëllimit tonë për administrimin e 100 milionë dozave në 100 ditët tona të para në zyrë”.

Biden planifikon të ketë strategji kombëtare, me përfshirje më të madhe të qeverisë federale, dhe jo t’ua lë shteteve veç e veç të vendosin se çfarë është më mirë.

Presidenti i zvogëloi pritjet, duke thënë se situata ka të ngjarë të përkeqësohet përpara se të përmirësohet. Ai tha se numri i viktimave në SHBA mund të kalojë 500,000 muajin e ardhshëm. Këtë javë kaloi mbi 400,000.