Çka bisedoi Kurti me Shefin e Zyrës së BE-së në Kosovë dhe ambasadorët e vendeve të Quint-it?

Vazhdimi i bashkëpunimit dhe bashkërendimit të veprimeve ndërmjet Qeverisë së Kosovës dhe përfaqësuesve të Bashkimit Evropian dhe shteteve të QUINT-it, ishte në qendër të takimit ndërmjet Kryeministrit Albin Kurti dhe Përfaqësuesit të Posaçëm të Bashkimit Evropian në Kosovë dhe ambasadorëve të Shteteve të Bashkuara të Amerikës, Gjermanisë, Mbretërisë së Bashkuar, Francës dhe Italisë.
Në takimin e përbashkët me Zëvendëskryeministrin, Besnik Bislimim, ministren Artane Rizvanolli dhe ministrin Hekuran Murati, u diskutua për marrëveshjen mbi zbatimin e udhërrëfyesit të energjisë, që mundëson pagesën e energjisë nga konsumatorët në komunat në veri të Kosovës, si dhe për zbatimin e marrëveshjes me ENTSO-E dhe rëndësinë që ka kjo për sovranitetin e vendit.
Gjithashtu, siç u bë e ditur në komunikatën e Qeverisë, u diskutua edhe për zhvillimet politike në vend, si dhe gjendjen e sigurisë në vend e rajon.
“Duke biseduar lidhur me dialogun ndërmjet Republikës së Kosovës dhe Serbisë, u ritheksua angazhimi i Qeverisë së Republikës së Kosovës për dialog parimor dhe të balancuar, për marrëveshje ligjërisht të obligueshme për normalizim të plotë të marrëdhënieve,  me njohjen reciproke në qendër.”, u bë e ditur tutje në komunikatën e Qeverisë./21Media