“Çmimet rriten, paga mbetet e njëjtë”! Ferati: Parashikimet janë të këqija, qytetarët e brengosur

Paralajmërimet për rritjen e çmimit të produkteve ushqimore për 50% deri në fund të vitit, ka brengosur qytetarët e vendit tha ekonomisti Rrahmetull Ferati. Ai u shpreh se më së shumti do ta pësojnë qytetarët pasi që shporta konsumatore rritet, ndërsa paga mesatare mbetet e njëjtë.
“Parashikimet janë që deri në fund të vitit rritja e produkteve ushqimore të rritet diku deri në 50%, të kemi rritje të çmimeve që është një indikator mjaftë shqetësues për ekonominë e vendit dhe për popullatën në përgjithësi. Ngase rritja kaq e lartë nuk mund ta përballojnë qytetarët e vendit nëse marrim parasysh pagën mesatare që është rreth 27 deri 28 mijë denarë, ndërsa shportën konsumatore e kemi 34 mijë denarë”, tha Rahmetullah Ferati – profesor i ekonomisë.
Ministri i Ekonomisë së Maqedonisë së Veriut, Kreshnik Bekteshi ditë më parë tha se parashikimet për rritje të çmimeve prej 50% të produkteve ushqimore nuk janë të sakta. Por, nëse ka rritje të madhe atëherë qeveria do të intervenojnë menjëherë me ngrirjen e çmimeve. E ekonomisti Ferati tha se qeveria duhet të parandalojë rritjen e energjisë elektrike që të mos rriten çmimet e produkteve ushqimore.
“Në bazë të parashikimeve shihet kjo. Tash kemi 20% rritje të çmimit të bukës por pritet të kemi ende në basë të krizës energjetike që kemi. Pritet që të rritet ngase energjia është elementi bazë i prodhimit të produkteve. Edhe pse nga ana e qeverisë mundohen të stabilizojnë dhe të qetësojnë popullatën mirëpo parashikimet janë të këqija”, shtoi Ferati.
Kryetar i Komisionit Rregullator Energjetik, Marko Bislimovski deklaroi se nuk ka arsye për panik dhe se qytetarët duhet të jenë të qetë pasi “A.D. Elektranat” mbulon tregun plotësisht dhe sigurojnë sasitë e nevojshme të energjisë elektrike.
Ndryshe sipas Entit të Statistikave shporta konsumatore vitin e kaluar në muajin korrik ka qenë 33 mijë 265 denarë apo 550 euro, ndërsa këtë vit është 34 mijë e 127 denarë, që do të thotë se është rritur për 3%, shkruan TV21./21Media