“Defender Europe 25” nis të dielën, stërvitje ushtarake në Shqipëri e Kosovë
Ministri i Mbrojtjes i Shqipërisë, Pirro Vengu, ka njoftuar se më 25 maj do të nisë një prej stërvitjeve më të mëdha ushtarake shumëkombëshe, e njohur si “Defender Europe 25”.
Përmes një postimi në Facebook ai ka shkruar se stërvitja do të drejtohet nga Komanda Evropiane e Shteteve të Bashkuara të Amerikës, derisa shtoi se stërvitje do të zhvillohen edhe në Kosovë.
“Më 25 maj, Shqipëria mirëpret një nga stërvitjet më të mëdha ushtarake shumëkombëshe: Defender Europe 25, e drejtuar nga Komanda Evropiane e SHBA (USEUCOM). Forcat e NATO-s dhe partnere do të stërviten në Shqipëri dhe Kosovë për mbrojtjen e objekteve kritike, operacione sulmuese dhe mbrojtëse, si dhe për sigurinë në pika kyçe dislokimi. Një test i ndërveprueshmërisë dhe një mesazh i qartë: NATO është e bashkuar”, ka shkruar Vengu.
Për stërvitjen në Kosovë pati njoftuar edhe ministri i Mbrojtjes, Ejup Maqedonci.
Ai ka thënë se përgatitjet për këtë ushtrim po zhvillohen sipas planit të paraparë dhe se janë të bindur se realizimi i tij do të jetë i suksesshëm.