Donjeta Sadiku garuesja e parë nga Kosova që do të paraqitet në Lojërat Olimpike

Mbrëmë u bë hapja zyrtare e Lojërave Olimpike në lumin Sena aty ku prezent ishin tetë mijë sportistë nga anembanë botës, në mesin e tyre edhe Kosova me garuesit e saj.

Garuesja e parë nga Kosova që do të paraqitet në Lojërat Olimpike është boksierja Donjeta Sadiku e cila sot zhvillon meçin e saj në kërkim të medaljes olimpike.

Pengesa e parë e Sadikut në ‘Paris 2024’ do të jetë boksierja nga Tajlanda, Thananya Somunek me meçin i cili i takon kategorisë deri në 60 kilogramë.

Në rast se Sadiku arrin ta kalojë me sukses kundërshtaren Somnuek, atëherë ajo do të kishte përballë boksieren kolumbiane Angie Paola Valdes Pana, ndërsa në një çerekfinale potenciale do të boksonte ndaj Kellie Harrington nga Irlanda.

Sadiku në ‘Paris 2024’ është me normë olimpike dhe nga nëntë garues sa e përfaqësojnë Kosovën gjithsej, ajo do ta nis e para.

Kjo nuk është hera e parë për Sadikun që paraqitet në Lojërat Olimpike, pasi që ajo kishte qenë pjesëmarrëse edhe në ‘Tokio 2020’ me ftesë të universalitetit.

Meçi mes Sadikut dhe Somnuek do të nis me fillim nga ora 21:00.