“E pamundur” të dihet se sa do të vazhdojë lufta, por Ukraina mund të fitojë

Departamenti Amerikan i Mbrojtjes thotë se është “e pamundur” të dihet se sa do të vazhdojë lufta në Ukrainë nëse nuk përfundon përmes diplomacisë, por se Ukraina “sigurisht” mund ta fitojë luftën.
“Fakti që [presidenti rus Vladimir Putin] do të përqendrohet në një zonë më të vogël gjeografike sigurisht që paraqet mundësinë që dhuna të vazhdojë”, tha sekretari i shtypit i Pentagonit, John Kirby. Madje sipas tij mund të intensifikohet në atë pjesë të Ukrainës, transmeton rtv21.tv.
Kirby përsëriti se Ukraina mund ta fitojë “absolutisht” luftën, siç tregohet nga paaftësia e Putinit për të arritur objektivat e tij strategjikë.
“Mariupol ende nuk është marrë. Ai ka zhvendosur forcat e tij nga Kievi. Ai ka lëvizur forcat e tij nga Chernihiv. Ata nuk e kanë marrë Kharkivin. Ata nuk e kanë marrë Mykolaiv në jug”, tha Kirby./21Media