Gjermania ka të ngjarë të përballet me mungesë të vaksinave të koronavirusit të paktën deri në prill, ka paralajmëruar ministri i shëndetësisë së Gjermanisë, Jens Spahn.

“Ne do të kemi të paktën edhe 10 javë të vështira me një mungesë të vaksinave”, shkroi Jens Spahn në Twitter.

Komentet e Spahn vijnë në mes të një mosmarrëveshjeje midis BE-së dhe prodhuesit të vaksinave AstraZeneca rreth mungesave të furnizimit, transmeton rtv21.tv.

Kompania me qendër në Mbretërinë e Bashkuar ka thënë që çështjet e prodhimit në impiantet e saj me qendër në Evropë do të thotë se nuk do të jetë në gjendje të japë numrin e premtuar të dozave në bllokun me 27 anëtarë. Por BE tha se firma duhet të respektojë angazhimet e saj.

Të enjten, Spahn bëri thirrje për një samit vaksinimi që përfshin kompani farmaceutike, prodhues dhe politikanë për të eksploruar se si mund të përshpejtohet përhapja.

Më parë këtë javë, Spahn mbështeti propozimin e BE-së për të krijuar një regjistër të eksporteve të vaksinave në mënyrë që të monitorojë se ku dërgohen dozat.

Ai gjithashtu tha se numri i rënies së rasteve në Gjermani ishte inkurajues dhe sugjeroi që shkollat mund të rihapen sapo bllokimi aktual të mbarojë më 14 shkurt.

Ndërkohë, vendi po përgatitet të ndalojë udhëtarët nga Mbretëria e Bashkuar, Brazili dhe Afrika e Jugut për shqetësimet mbi variantet e reja./21Media