Gjermania mbyll kufijtë me Republikën Çeke dhe Tirolin

 

Gjermania do të mbyllë kufijtë e saj, me disa përjashtime, me Republikën Çeke dhe rajonin austriak të Tirolit, që regjistrojnë nivele të larta të infektimit me variantet më shumë ngjitëse të COVID-19, njoftoi sot ministri i Brendshëm, Horst Seehofer.

“Kjo është ajo që ne do të vendosim. Kjo është rënë dakord me kancelaren dhe zëvendëskancelarin”, tha ministri për “Süddeutsche Zeitung”, duke specifikuar që kjo masë duhet të hyjë në fuqi të dielën në mbrëmje dhe se përjashtimet ishin në pritje të diskutimit.

Seehofer sqaroi se Tiroli dhe rajonet çeke kufitare me Gjermanisë do të përfshihen në listën e territoreve shumë të prekura nga mutacionet e virusit.

Kjo listë tashmë përfshin vende të tilla, si Britania e Madhe, Afrika e Jugut, Brazili ose Portugalia, me të cilat Gjermania ndaloi shumicën e udhëtimeve në fund të janarit.