Gjimnazistja Liridona Hyseni do ta përfaqësojë Kosovën në Kampionatin Evropian

18 vjeçarja nga Skënderaj, Liridona Hyseni do ta përfaqësojë Kosovën në Kampionatin Evropian, që do të mbahet në Turqi, ku do të marrin pjesë mbi 70 shtete të botës.
Nxënësja e gjimnazit “Hamëz Jashari” në Skënderaj do të garojë në muajin qershor në Kampionatin Evropian, në fushën e artit figurativ.
Liridona për rtv21.tv sot ka deklaruar se ta përfaqësojë Kosovën është ndjenjë e veçantë. “Përvojë e mirë dhe krenare!”, ka theksuar ajo.
18 vjeçarja ka treguar se me art merret që nga mosha 5 vjeçare, por intensivisht është duke e praktikuar në 6 vjetët e fundit.
Gjimnazistja për rtv21.tv ka treguar se kush ia ka zbuluar talentin dhe se çfarë ka dëshirë më shumë të pikturojë.
“Mua më pëlqen të pikturoj më shumë portrete e sidomos portretet e figurave të shquara shqiptare. Talentin tim për art ma e zbuluan familjarët. Unë bëj art çdo ditë.”, ka potencuar Hyseni.
Liridona Hyseni nga fshati Vojnik i Skënderajt ka shtuar se ka marrë pjesë në gara vendore, në komunë, me ç’rast ka dalë me rezultate të mira.
Kujtojmë që, më 28 mars, një nxënëse tjetër e gjimnazit “Hamëz Jashari”, Altina Salihu me temën për “Bullizmin”, e ka zënë vendin e parë në Kampionatin Botëror, në Danimarkë./21Media