Hoti thotë se LDK-ja i ka dyert e hapura kudo në botë

 

 

 

Qeveria e drejtuar nga LDK-ja, si pjesë e Partive Popullore Evropiane, i ka të hapura të gjitha dyert në Evropë, Shtetet e Bashkuara të Amerikës dhe kudo në vendet demokratike.

Kështu deklaroi kandidati i LDK-së për kryeministër, Avdullah Hoti, të enjten gjatë tubimit elektoral në Pejë.

“Me qeverisjen tonë Kosova i është kthyer normalitetit, është kthyer besimi tek aleatët tanë euro-atlantikë, janë hequr sanksionet ekonomike nga SHBA, erdhi njohja nga Izraeli, kemi nisur projekte 1 miliard dollarë nga Marrëveshja e Uashingtonit, kemi arritur ta menaxhojmë më mirë se çdo kush tjetër pandeminë dhe kemi ruajtur ekonominë e vendit tonë. Kundërshtarët tanë po bëjnë fushata linçuese, po japim premtime pa bazë dhe të pa menduara, po prodhojnë lajme të rrejshme, po kërcënojnë institucionet e drejtësisë”, tha Hoti.

Para simpatizantëve të tij, Hoti kujtoi periudhën kur mori drejtimin e Qeverisë, duke thënë se Kosova ishte në izolim ndërkombëtar.

“Kur e morën ne Qeverinë, shkuam në Uashington. Nuk kishte thika e harta. Ne e nënshkruam marrëveshje ekonomike për projekte prej 1 miliard dollar, sollëm njohjen nga Izraeli dhe fuqizuam miqësinë tonë speciale me Amerikën. Me këtë marrëveshje e hapëm pikën e përbashkët kufitare në Merdarë, dhe sivjet mërgimtarët tanë kanë pritur më pak në kufi kur kanë vizituar familjet e tyre për festat e fundvitit. Nga kërcënimi për tërheqjen e ushtrisë amerikane, ne arritëm që Ushtrinë e Kosovës ta dërgojmë në misione paqeruajtëse ndërkombëtare bashkë me ushtrinë amerikane”, tha ai.

Kryeministri Hoti foli edhe për programin që LDK-ja ofron për qytetarët e Kosovës.

“Qeverisja jonë do ta garantoj pagën minimale 300 euro. Do të heqim kufizimin për 15 vjet për pensionet kontribut-dhënëse. Deri në vitin 2023 nuk do të ketë ndihmë sociale apo pension nën 300 euro. Asistenca sociale do të lidhet me koston e jetesës dhe rritet për 30%. Do të institucionalizojmë kujdesin për personat me nevoja të veçanta. Ashtu sikurse Ju dhe qytetaret e Pejës, edhe unë jam i mërzitur pse nuk ka shkuar ashtu sikurse kemi dashur projekti i Borea-s. Unë i premtoj Kryetarit Muhaxheri dhe gjithë pejanëve nga ky tubim, se me mua kryeministër dhe me Gazmendin kryetar, Borea do të bëhet siç e kemi planifikuar dhe siç e duan pejanët”, theksoi Hoti.

Duke votuar numrin 132 më 14 shkurt, Hoti tha se qytetarët votojnë për ruajtjen e kursit perëndimor të Kosovës./21Media