IHMK thotë se reshje  do të ketë deri më 25 janar

Instituti Hidrometeorologjik i Kosovës, sot ka informuar se situata e përgjithshme hidrometeorologjike në pjesën më të madhe të vendit ditëve të fundit është përkeqësuar si pasojë e reshjeve intensive të shiut, sidomos në disa pjesë të vendit.
Sipas IHMK-së, situata më e rënduar është në pjesën perëndimore, veriperëndimore dhe veriore të vendit.
Instituti ka bërë të ditur se reshjet e shiut me intensitet të ndryshuar, pritet të vazhdojnë edhe gjatë ditëve në vazhdim, deri më 25 janar, duke u bazar në situatën e vështirërsuar hidrologjike, ku lumenjtë kanë dalur prej shtetërve të tyre, duke shkaktuar përmbytje.
“Aktualisht situata më e rënduar është në pjesën perendimore, veriperendimore, dhe veriore të vendit, por duke pasur parasyshë reshjet të cilat janë duke vazhduar aktualisht dhe ditët në vijim, mund të shkaktojnë probleme dhe vështërsi edhe në pjesët tjera të vendit.”, është bërë e ditur në njoftim.
Ndryshe, si pasojë e reshjeve të dendura të shiut, dje janë shkaktuar vërshime në disa komuna të Kosovës, si Pejë, Mitrovicë, Istog, Podujevë, Skënderaj.
Kosova përballet me vërshimet
Situata në vend është rënduar pas të reshurave të shiut duke bërë që shumë zona të jenë të përmbytura. Qeveria dhe institucionet vartëse thonë se po vazhdojnë angazhimin për të garantuar normalitet në këto situata të vështira.
Skenderaj dhe Mitrovica janë dy komunat më të prekura dhe kanë shpallur gjendje të jashtëzakonshme. Megjithëse, të dy komunat nga përditësimet e fundit në terren thonë se gjendja është nën kontroll.
Ministrat Xhelal Sveçla, Artanë Rizvanolli dhe Elbert Krasniqi kanë qëndruar në Mitrovicë, më pas kanë vazhduar me inspektimin e gjendjes në rrugën nacionale Mitrovicë-Bërnjak e cila pjesërisht vazhdon të jetë e bllokuar, për shkak të rrëshqitjeve të shumta të dheut.
Ministrat vizituan edhe pendën e liqenit të Ujmanit, ku përkundër nivelit të lartë të ujit situata po menaxhohet suksesshëm. Me këtë rast ministrat vizituan edhe stacionet policore në atë zonë, ku policët pa u kursyer po kontribuojnë në menaxhimin e situatës, si dhe asistimin e qytetarëve, pa dallim.
Në fshatin Drejë të Istogut, Forca e Sigurisë së Kosovës evakuoi 14 familje me rreth 60 anëtarë të cilit kishin mbetur të bllokuar gjatë gjithë ditës së enjte.
Vështirësi ka pasur edhe në komunën e Pejës, më saktësisht në fshatin Baran ku situata ka qenë më e rëndë.
Në Podujevë situatë më e rëndë është paraqitur në fshatrat Pakashticë, Letanc, Siboc dhe disa zona urbane që janë prekur nga vërshimet. Komuna e Podujevës ka thënë se gjendja në teren është tejet e rëndë, ndërsa kanë angazhuar 5 kompani të cilat po punojnë me kapacitete të plota në intervenim.
Duke e parë gjendjen e krijuar si pasojë e reshjeve të vazhdueshme të shiut, ku në disa fshatra qarkullimi është vështirësuar në masë të madhe, Drejtoria Komunale e Arsimit në Klinë, mori që sot (e premte) të mos mbahet mësim në shkollat e komunës së Klinës.