Junta e Mianmarit e falë pjesërisht ish-kryeministren Aung San Suu Kyi

Junta e Mianmar ka falur Aung San Suu Kyi-n për pesë akuza ligjore, ka njoftuar televizioni i kontrolluar nga ushtria, megjithëse liderja e rrëzuar ende përballet me më shumë se dy dekada burgim.

Aung San Suu Kyi është arrestuar nga ushtria që nga 1 shkurti 2021, pas një grusht shteti të suksesshëm. 78-vjeçarja që atëherë është dënuar për akuza të shumta – duke përfshirë nxitje, mashtrim zgjedhor dhe korrupsion.

Në një deklaratë të publikuar në televizionin ushtarak, bëhet e ditur se në kuadër të amnistisë janë falur pesë raste, por mbeten 14 raste. Kjo do të thotë se dënimi i saj 33-vjeçar do të reduktohet me gjashtë vjet, shkruan Guardian, përcjell rtv21.tv.

Presidenti i rrëzuar Win Myint, i cili gjithashtu ishte arrestuar që nga grushti i shtetit, do të falej për dy raste. Ai ishte përballur me tetë raste, por ky numër është reduktuar në gjashtë. Dënimi i tij do të reduktohet me katër vjet.

Njoftimi ishte pjesë e një amnistie prej më shumë se 7,000 të burgosurish për të shënuar Kreshmën Budiste. Imazhet e publikuara nga media e pavarur treguan anëtarët e familjes duke pritur para burgut Insein, duke shpresuar se të dashurit e tyre do të liroheshin.

Më shumë se 19,700 njerëz janë në paraburgim, sipas Shoqatës së Ndihmës për të Burgosurit Politikë në Birmani, e cila gjurmon arrestimet. Kushdo që dyshohet se ka vënë në dyshim sundimin ushtarak rrezikon të burgoset.

Aung San Suu Kyi, e cila është parë vetëm një herë që nga grushti i shtetit të vitit 2021 në imazhet e bëra në një sallë gjyqi në Naypyidaw, po apelon kundër dënimeve të saj. /21Media