KFOR për RTV21: Të gjitha palët të përmbahen, jemi të gatshëm ta mbështesim Policinë e Kosovës

KFOR-i ka dënuar ashpër sulmet ndaj pjesëtarëve të Policisë së Kosovës.

Nga KFOR-i, për rtv21.tv kanë thënë se konfirmojnë gatishmërinë për të mbështetur Policinë e Kosovës, nëse është e nevojshme dhe nëse kërkohet.

“Ne presim që të gjitha palët të veprojnë me përgjegjësi dhe konstruktive, dhe të përmbahen nga veprimet që mund të përshkallëzojnë në mënyrë të panevojshme tensionet, të ndikojnë negativisht në sigurinë në Kosovë dhe stabilitetin në të gjithë rajonin”, thuhet në përgjigjen e KFOR-it.

“KFOR-i mbetet plotësisht i fokusuar në zbatimin e përditshëm të mandatit të tij të OKB-së, për të siguruar një mjedis të sigurt dhe të sigurt dhe lirinë e lëvizjes për të mirën e të gjitha komuniteteve që jetojnë në Kosovë”, thuhet tutje në përgjigjen e tyre.

Ministria e Punëve të Brendshme dhe Policia e Kosovës kanë bërë të ditur përmes një konference sot se Policia e Kosovës është sulmuar katër herë në tri ditët e fundit në pjesën veriore.

Xhelal Sveçla, ministër i Punëve të Brendshme, ka sqaruar se rastet e fundit nuk janë bërë publike në fillim për t’i dhënë kohë Policisë për t’i zbuluar shkaktarët.

Sulmet janë dënuar nga krerët e shtetit të Kosovës dhe ndërkombëtarët.

Ndërkohë, presidentja Vjosa Osmani ka mbledhur sot strukturat e sigurisë së Kosovës, ka mësuar rtv21.tv nga burimet e saj./21Media

Artikuj të ngjashëm

Back to top button