Klinika e Kardiologjisë trajtoi 6 mijë pacientë me probleme në zemër

Shërbimi Spitalor Klinik dhe Universitar i Kosovës(ShSKUK) ka njoftuar se 6 mijë pacientë me probleme të ndryshme kardiologjike (të zemrës), janë trajtuar nga 1 janari 2022, deri më tani, në kuadër të Klinikës së Kardiologjisë, të Qendrës Klinike Universitare të Kosovës, prej tyre 921 në kuadër të Njësisë Koronare dhe të tjerët në kuadër të reparteve të tjera të kësaj klinike.
Në njoftim bëhet e ditur se mjekët e kësaj klinike kanë kryer mbi 12 mijë e 500 vizita ambulantore për pacientët, në shërbime të ndryshme ambulantore.
Sipas po të njëjtit raport, stafi ka kryer 2 mijë e 680 koronarografi, 1 mijë e 600 raste të stentimit, duke vendosur 2 mijë e 680 stenta. “Janë kryer edhe shumë shërbime të tjera kardiologjike në reparte të ndryshme, përfshirë raste elektrofiziologjike”, thuhet në një postim të Shërbimit Spitalor Klinik dhe Universitar të Kosovës në Facebook./21Media