Konjufca: Me rrëmbimin e policëve, Serbia e ka hedhur poshtë marrëveshjen e Ohrit dhe Brukselit

Kryetari i Kuvendit të Kosovës, Glauk Konjufca, e ka dënuar aktin e rrëmbimit të policëve kufitarë të Kosovës, nga xhandarmëria e Serbisë.

Konjufca ka thënë se ky akt i cënimit të sovranitetit dhe sigurisë së Kosovës nga Serbia është tregues i qartë se kush dëshiron të nxisë tensione në mes dy vendeve.

“Në kohën kur Serbia do duhej të urdhëronte bandat kriminale në veri të Kosovës që të tërhiqeshin nga përpjekja për destabilizim të rendit në katër komunat veriore të Kosovës, ajo vazhdon më tutje duke i përfshirë formacionet zyrtare policore në cënimin e integritetit territorial të Kosovës”, ka shkruar Konjufca në Facebook.

Konjufca i ka kërkuar faktorit ndërkombëtar, veçanërisht BE-së dhe SHBA-së që ta dënojnë Serbinë për këto akte agresioni kundrejt Kosovës.

“Në kohën kur qeveria e Kosovës po del me propozime për t’i gjetur zgjidhje destabilizimit të shkaktuar nga grupet kriminale të mbështetura nga Beogradi, Serbia dëshmon nuk është e gatshme për asnjë zgjidhje. Prandaj, i kërkojmë fuqishëm faktorit ndërkombëtar, veçanërisht BE-së dhe SHBA-së që ta dënojnë Serbinë për këto akte agresioni kundrejt Kosovës. Lirimi i menjëhershëm i tre policëve të Kosovës është ultimativ”, ka shkruar Konjufca.

Tutje, Konjufca ka thënë se me këtë akt, Serbia në mënyrë të hapur dhe tepër të rrezikshme e ka hedhur poshtë marrëveshjen bazë të normalizimit të marrëdhënieve të pranuar në Ohër dhe Bruksel.

Policia e Kosovës ka dënuar “kidnapimin klasik të organizuar” të tre zyrtarëve policorë të Kosovës nga forcat serbe thellë në territorin e Kosovës./21Media