Konjufca tha se Vuçiq e di mirë se ku janë të zhdukurit e Kosovës, reagon Petkoviq

“Nervozizmi në Prishtinë për rezultatin e takimit të fundit në Ohër po përshkallëzohet dita-ditës dhe tregon se aktorët politikë atje janë në panik, jo për shkak të obligimeve që ka Beogradi, por për shkak të obligimeve që ka Prishtina e të cilat deri më tani me paturpësi ka refuzuar t’i përmbushë”, ka pretenduar i emëruari i Vuçiqit për propagandë kundër Kosovës, Petar Petkoviq.

“Një nga këto obligime është puna për formimin e Asociacionit të komunave me shumicë serbe, dhe i dyti, siç e tregon deklarata e sotme, e thënë më butë, “e pavend” e kryetarit të Kuvendit të “institucioneve të përkohshme të vetëqeverisjes” në Prishtinë, Glauk Konjufca, përcaktimi i fatit të personave të zhdukur. Ekstremistët e Prishtinës e bazojnë ideologjinë e tyre të çuditshme separatiste në gënjeshtrat se shqiptarët nuk kanë kryer krime dhe akte terroriste në Kosovë, edhe pse “faktet e padiskutueshme” thonë krejt të kundërtën”, ka deklaruar Petkoviq në një kumtesë, duke e kryer detyrën e tij parësore të mbrojë me çdo kusht shefin e tij Vuçiq.

Kujtojmë, Konjufca ka deklaruar se nëse komuniteti ndërkombëtar thotë se Vuçiqi nuk di se ku janë të zhdukurit, atëherë gënjen, sepse Vuçiq e di mirë se ku janë.

Ai gjithashtu ka kërkuar që presidenti serb të akuzohet njësoj si Putini.

Duke fshehur krimet dhe gjenocidin e kryer në Kosovë, presidenti serb Aleksandar Vuçiq e meriton të gjykohet në Gjykatën Ndërkombëtare, siç po bëhet aktualisht kundër presidentit të Rusisë Vladimir Putin, ka thënë Konjfuca duke shtuar se me këtë ai po kryen krim të rëndë kundër njerëzimit.