Koreja e Jugut shënon sërish shkallën më të ulët të lindshmërisë në botë
Koreja e Jugut regjistroi sërish shkallën më të ulët të lindshmërisë në botë.
Norma në vend ra për herë të parë më pak se një fëmijë për grua në vitin 2018. Por të mërkurën, shifrat e publikuara nga qeveria treguan se shifra kishte rënë në 0.81 – tre pikë më pak se një vjet më parë, dhe një rënie e gjashtë radhazi, raporton BBC
Në krahasim, norma mesatare në ekonomitë më të përparuara të botës është 1.6 fëmijë.
Vendeve u duhen të paktën dy fëmijë për çift – një normë 2.1 – për të mbajtur popullsinë e tyre në të njëjtën shkallë, pa migrim.
Normat e fertilitetit kanë “rënie të dukshme” në gjashtë dekadat e fundit thotë Organizata për Bashkëpunim Ekonomik dhe Zhvillim. Por trendi ka qenë veçanërisht i theksuar në Korenë e Jugut, ku madhësia e familjeve është zvogëluar në harkun e disa brezave. Në fillim të viteve të 70-ta gratë kishin mesatarisht katër fëmijë.
Një popullsi në rënie mund të vërë një vend nën një tendosje të madhe. Përveç rritjes së presionit mbi shpenzimet publike ndërsa kërkesa për sisteme të kujdesit shëndetësor dhe pensione rritet, një rënie e popullsisë së të rinjve çon gjithashtu në mungesa të fuqisë punëtore që ndikojnë në ekonomi.
Në vitin 2020 pati një alarm të përhapur në Korenë e Jugut kur regjistroi më shumë vdekje sesa lindje.
Në vitet e fundit, presionet ekonomike dhe faktorët e karrierës kanë qenë konsiderata kryesore për njerëzit që vendosin për fëmijët, thonë ekspertët.
Për shifrat e vitit 2021, ekspertët përmendën kostot më të larta të jetesës, një rritje të çmimeve të banesave dhe ndikimin e pandemisë Covid si faktorë që i dekurajojnë ata që të kenë fëmijë./21Media