Kthehet në rigjykim rasti i Todosijeviqit për masakrën e Reçakut

Gjykata Supreme ka kthyer në rigjykim rastin e Ivan Todosijeviq, i dënuar për nxitje të urrejtjes, përçarjes ose mosdurimit kombëtar, racor, fetar apo etnik.
I njëjti sipas komunikës për media nga Gjykata Supreme ishte i dënuar me burg.
“Gjykata Supreme ka aprovuar kërkesën për mbrojtje të ligjshmërisë të mbrojtësit të dënuarit I.T., dhe ka anuluar aktgjykimin e Gjykatës Themelore në Prishtinë – Departamenti Special PS.nr.20/2019 i datës 05.12.2019, dhe aktgjykimin e Gjykatës së Apelit të Kosovës – Departamenti Special, APS.nr.7/2020 i datës 24.06.2021, dhe çështjen e ka kthyer në gjykatën e shkallës së parë, në rigjykim”, thuhet në komunikatë.
Me dy vjet burgim ishte dënuar ish-ministri i Administratës dhe Pushtetit Lokal (MAPL), Ivan Todosijeviq.
Ai ishte shpallur fajtor për deklaratat që i kishte bërë në lidhje me shqiptarët dhe masakrën e Reçakut.
Todosijeviq, masakrën e 45 civilëve shqiptarë nga forcat serbe në Reçak, e ka quajtur trillim./21Media