Kurti: Termi i marrëveshjes së 4 prillit është “viktimat e zhdukura me dhunë”

Kryeministri i Kosovës, Albin Kurti ka deklaruar se dakordimi për deklaratën për të zhdukur në tekstin e saj do t’u referohen si të “zhdukur me dhunë”.

Këto komente Kurti i bëri pas pjesëmarrjes së tij në konferencën “Strategjia e e-Qeverisjes në funksion të përmirësimit të ofrimit të shërbimeve publike”, të organizuar nga Ministria e Punëve të Brendshme.

“Formulimi është ata që janë të zhdukur me dhunë dhe kështu është termi i cili është dhe ndodhet në përmbajtjen e marrëveshjes. Pra, edhe atëherë kur do të deklarohet, do të thuhet përsonat e pagjetur të zhdukur që mungojnë gjithmonë bëhet fjalë për të zhdukurit me dhunë”, tha ai.

Sa i takon draftit të Statusit të Asociacionit të Komunave me Shumicë Serbe, shefi i ekzekutivit kosovar tha se fillimisht do t’i analizojnë rezultatet e takimit të zhvilluar në Bruksel, gjatë kësaj jave.

Ai konfirmoi se gjatë muajit prill do të ketë një takim të nivelit të lartë në Bruksel.

“Ne do të analizojmë më zëvendëskryeministrin Bislimi rezultatet nga takimi i zhvilluar në Bruksel dhe mandej do të përcaktojmë një ecje përpara për muajin prill, brenda të cilit do të ketë edhe një takim të nivelit të lartë. Theksoj se duhet të zbatohet e gjithë marrëveshja dhe në kuadër të marrëveshjes, kemi një nen që është i 10 dhe është për zbatimin e marrëveshjeve të mëhershme por si një çështje urgjente është çështja e të pagjeturve”, tha ai.

Zëvendëskryeministri për dialog i Kosovës, Besnik Bislimi dhe kryenegociatori serb, Petar Petkoviq të martën nën ndërmjetësimin e përfaqësuesit të posaçëm i Bashkimit Evropian për dialogun Kosovë-Serbi, Mirosllav Lajçak zhvilluan takimin e radhës në kuadër të dialogut Kosovë-Serbi.

S’ka takim me 22 prill, refuzoi Vuçiqi

Zëvendëskryeministri i Kosovës, Besnik Bilimi ka thënë se kryeministri i Kosovës është shprehur i gatshëm për takime presidentin serb, Aleksandar Vuçiq më 22 prill në Bruksel, por jo edhe presidenti serb.

Sipas Bislimit, Vuçiq ka thënë se nuk mund të udhëtojë drejt Brukselit me këtë datë.

“Temë tjetër në Bruksel ka qenë caktimi i datës së për takimin e radhës të nivelit të lartë. Lajçak ka propozuar që datë e takimit të jetë 22 prilli. Kryeministri Kurti është pajtuar, por pastaj nga presidenti i Serbisë ka ardhë njoftim se nuk mund të udhëtojë me datën 22 prill. Tash jemi në kërkim të datës alterantive”, ka thënë Bislimi ndër të tjera.

Ndryshe , të martënshefi i ekipit negociator të Kosovës, Besnik Bislimi, ka marrë pjesë në takimin në Bruksel të zhvilluar në nivel të kryenegociatorëve, në të cilin u diskutua zbatimi i marrëveshjes së dakorduar në Ohër./21Media