Lavrov tha se Hitleri “kishte gjak çifut”, zemërohet qeveria izraelite

Ministri i Jashtëm rus, Sergey Lavrov tha gjatë fundjavës se diktatori nazist, Adolf Hitler kishte “gjak hebre”, duke shkaktuar reagime të furishme nga Izraeli të hënën.
“Vërejtjet e Ministrit të Jashtëm Lavrov janë një deklaratë e pafalshme dhe e egër, si dhe një gabim i tmerrshëm historik”, tha Ministri i Jashtëm izraelit Yair Lapid.
“Hebrenjtë nuk e vranë veten në Holokaust. Niveli më i ulët i racizmit kundër hebrenjve është të akuzosh vetë hebrenjtë për antisemitizëm”, shtoi ai.
Lavrov i bëri komentet në televizionin italian të dielën, duke përsëritur pretendimin e Rusisë se pushtimi i saj në Ukrainë është për të “de-nazifizuar” vendin, transmeton rtv21.tv.
Ai hodhi poshtë faktin se presidenti i Ukrainës, Volodymyr Zelensky është hebre.
“Ai [Zelensky] parashtron një argument: çfarë lloj nazizmi mund të kenë nëse ai është hebre. Mund të kem gabim, por Hitleri kishte edhe gjak hebre. Nuk do të thotë absolutisht asgjë. Populli i mençur hebre thotë se antisemitët më të zjarrtë janë zakonisht hebrenjtë”, tha Lavrov.
Ministria e Jashtme e Izraelit thirri të hënën ambasadorin rus në Izrael lidhur me komentet e Lavrov.
Dani Dayan, i cili drejton vendin e përkujtimit të Holokaustit Yad Vashem në Izrael, tha se ishte “plotësisht e pabazë” të thuhej se Hitleri ishte me origjinë hebreje.
Dhe ai kritikoi etiketimin e ukrainasve nga Rusia si naziste.
Ministri i Jashtëm i Ukrainës Dmytro Kuleba tha se komentet e bëra nga homologu i tij rus ishin “të neveritshme”./21Media