LDK për shkarkimin e rektorit: Këshilli Drejtues i UP-së ekzekutoi kërkesën politike të Qeverisë

Lidhja Demokratike e Kosovës (LDK), ka reaguar ndaj vendimit të këshillit drejtues të Universiteti të Prishtinës “Hasan Prishtina”, i cili shkarkoi rektorin i këtij universiteti, Naser Sahitin.
Sipas reagimit të LDK-së, këshilli drejtues i UP-së, ekzekutoi sot sheshazi kërkesën politike të Qeverisë për të instaluar rektor të dëgjueshëm të pushtetit në UP.
“Ndërhyrja e pushtetit në UP është akt i papranueshëm. Nën ndikimin e partisë në pushtet, Këshilli Drejtues i Universiteti të Prishtinës “Hasan Prishtina e shkarkoi sot rektorin i këtij universiteti, Prof. dr. Naser Sahitin. Për Lidhjen Demokratike të Kosovës kjo është ndërhyrje e papranueshme e politikës në institucionet arsimore. Këtij akti të papranueshëm e të dëmshëm për arsimin i ka paraprirë kapja e Këshillit Drejtues të UP-së nga partia në pushtet përmes përzgjedhjes së kandidatëve me kriter partiak-klientelist e me integritet të kontestuar”, thuhet në reagimin e LDK-së.
Sipas tyre, efektet e ushtrimit të ndikimit dhe të kontrollit nga pushteti në arsimin e lartë dëmtojnë rëndë cilësinë dhe funksionimin institucional.
“Dija, hulumtimi shkencor dhe studimi në universitet janë jetike për zhvillimin e arsimit, ndaj çdo ndërhyrje politike në këtë institucion të rëndësishëm është i pafalshëm. Lidhja Demokratike e Kosovës vlerëson se respektimi i autoniomisë së universitetit është kusht për të siguruar integritetin dhe cilësinë e arsimit të lartë”, thuhet tutje në reagim.
Sot është shkarkuar nga pozita e Rektorit të Universitetit të Prishtinës, rektori Naser Sahiti./21Media

Back to top button