Lluka: Ristrukturimi i Telekomit të Kosovës duhet të ndodhë

“Kjo fazë do të marrë mbështetjen e Bankës për Rindërtim dhe Zhvillim”

Ministri i Zhvillimit Ekonomik, Valdrin Lluka së bashku me kryetarin e Sindikatës së Telekomit të Kosovës, Lami Balaj ka mbajtur konferencë për media, ku është diskutuar për zhvillimet e fundit në Telekom.

I pari i MZHE-së ka thënë se ristrukturimi që do të ndodhë në Telekom është i domosdoshëm dhe se kërkesat e sindikatës do të merren parasysh.

“Sot kishim një takim të përbashkët me Sindikatën e Telekomit ku diskutuam për brengat që kemi dhe planin për vitin 2019 dhe fazat e ristrukturimit, ku jemi futur në katër faza”, ka thënë ai.

Gjithashtu, ministri Lluka ka shtuar se ristrukturimi i Telekomit do të marrë mbështetjen e Bankës për Rindërtim dhe Zhvillim.

“Kjo fazë do të marrë mbështetjen e Bankës për Rindërtim dhe Zhvillim në mënyrë që punëtorët të ndihen komod për procedurat që do të ndiqen. Ideja është që sindikata të jetë e përfaqësuar në vendimmarrje”, ka thënë Lluka.

Ndërsa, Kryetari i Sindikatës së Telekomit të Kosovës, Lami Balaj ka thënë se ristrukturimi i Telekomit është më rëndësi dhe se ky ristrukturim do të përfshijë edhe sindikatën.

“Sot diskutuam për gjendjen në Telekom, por më e rëndësishmja është ristrukturimi në Telekom. Ne si sindikatë e kemi përkrah ristrukturimin sepse Telekomi ka nevojë. Ky proces do të përfshijë edhe sindikatën dhe ne do të jemi të zëshëm aty”, ka shtuar Lami Balaj.