Malishevë: Reduktohet puna në administratën komunale

Kuvendi ndërpreu të gjitha aktivitetet

Pas shpalljes së gjendjes emergjente në shëndetësi, vendimeve të Qeverisë së Kosovës dhe infektimit të katër personave me virusin korona (COVID-19), Komuna e Malishevës ka marrë vendim të reduktojë punën e administratës komunale, përkatësisht zvogëlimin e stafit në maksimum.

Po ashtu, siç njoftohet edhe Kuvendi i Komunës së Malishevës ka marrë vendim për pezullimin e të gjitha aktiviteteve të saj.

Të gjitha këto masa janë në kuadër të zbatimit të vendimeve qeveritare me qëllim të parandalimit të COVID-19.

“Me qëllim të zbatimit të të gjitha vendimeve dhe rekomandimeve, kryetari i Komunës së Malishevës, Ragip Begaj, i ka mbajtur dy takime. Fillimisht është mbajtur një takim i kryetarit me kryesuesin e KK të Malishevës, Rrahim Morina dhe përfaqësuesit e subjekteve politike në kuvend, të cilët janë njoftuar me situatën e krijuar dhe më pas është mbajtur edhe takimi i shtabit për menaxhimin e situatës me COVID-19.”, bëri të ditur komuna e Malishevës.

Qytetarëve që kanë nevojë për shërbime shëndetësore, iu bë apel, që përjashtuar rastet e rënda, të mos vizitojnë Qendrën Kryesore të Mjekësisë Familjare, ndërsa rastet për dyshime që potencialisht mund të jenë të prekur me COVID-19, apo familjarët e të prekurve, të thërrasin urgjencën në Malishevë dhe ekipet shëndetësore do t’i vizitojnë në shtëpi dhe ju ofrojnë ndihmën e nevojshme.

“Po ashtu, ju bëhet thirrje kompanive furnizuese, që ti kontaktojnë personat përgjegjës për furnizim me medikamente dhe ushqime, për të lejuar futjen e tyre në Malishevë, pasi Malisheva është në karantinë të plotë. Për furnizim me mallra ushqimore, kompanitë luten ta kontaktojnë Valon Mazrekun, drejtor për financa, në numrin e telefonit 044 233 886, ndërsa për furnizim me barna, të kontaktojnë drejtorin e  shëndetësisë, Liridon Hoti, në numrin e  telefonit 045 976 170.”, theksoi më tutje komuna e Malishevës përmes komunikatës.

Në Kosovë, numri i të prekurve nga koronavirusi ka shkuar në 13-të. Deri tani tri qytete të vendit janë në karantinë, Klina, Vitia dhe Malisheva, ndërsa mbrëmë edhe një qytetar nga Podujeva është prekur nga koronavirusi. Qeveria e Kosovës mbrëmë ka shpallur gjendje emergjente të shëndetit publik./21Media

Back to top button