Maloku: Qeveria po bie pre e presionit të faktorit ndërkombëtar – papjekuri politike
Analisti politik, Albinot Maloku lidhur me vendimin e ri për targat, ka thënë se Qeveria po bie pre e faktorit ndërkombëtar, dhe kjo tregon një – siç e quan ai “papjekuri politike”.
“Nëse bazohemi në këtë përshtypje edhe marrëveshjet tjera të cilat nuk do të ishin ndoshta të mira për Kosovën – një Qeveri e cila nuk ka modalitete paraprake të ardhjes së një situate ku edhe Qeveria del që po bie pre e presionit të faktorit ndërkombëtar – papjekuri politike dhe tentim për të treguar fuqinë e vet, duke e ditur qe Kosova duhet të ketë koordinim me faktorin ndërkombëtar. Qeveria e Kosovës duhet ta marrë mendimin edhe të faktorit ndërkombëtar, e të mos dalë jo serioze me vendime të tilla”, tha Maloku.
Ndërkaq, Qeveria e Kosovës ka vendosur të bëjë shkallëzimin e sanksioneve për qytetarët që nuk e respektojnë afatin e vendosur për kthim të targave ilegale në ato RKS, deri më 31 tetor.
Ky vendim është marrë të premten në mbledhjen e 103-të të Qeverisë.
“Targat PR, KM, PZ, GL, UR, PE, DA apo GJA, janë targa ilegale. Qeveria e Republikës së Kosovës përmes vendimit ka obliguar pronarët e mjeteve me targa ilegale t’i kthejnë në targa zyrtare RKS. Tash ne kemi zhvilluar diskutime edhe të brendshme, me ministrinë e linjës dhe me organet e sigurisë. Kemi ardhur në përfundim të sjellim propozim një vendim, i cili bën sekuencim dhe shkallëzim të sanksioneve me rastin e zbatimit të këtij vendimi”, ka thënë Kurti.
“Për tri javë, duke filluar nga data 1 nëntori deri më 21 nëntor 2022, do të jetë masa e qortimit, pastaj për dy muaj deri më 21 janar do të jetë masa e gjobitjes, dhe më pastaj nga 21 janari do të kemi targa provuese për dy muaj të tjerë, pas së cilës datë më 21 prill nuk mund të ketë sepse nuk mund të lejohen targa të tjera në Republikën e Kosovës”, ka shtuar ai.
Kurti ka theksuar se nëpërmjet këtij sekuencim dhe shkallëzim, Qeveria tregon seriozitetin që padyshim ta zbatojmë vendimin që kemi marrë e në të njëjtën kohë t’u japin shanse të gjithë atyre që janë të interesuar të integrohen./21Media