Monumentet kulturore në Ukrainë janë shkatërruar ndërsa pushtimi rus vazhdon

Të premten e kaluar, shtëpia historike e poetit dhe filozofit të çmuar ukrainas Hryhori Skovoroda u shkatërrua nga një sulm artilerie ruse, së bashku me një muze të veprës së tij.
Shtëpia e Skovoroda-s ishte në një fshat të vogël jo shumë larg Kharkiv-it – askund afër ndonjë objektivi të dukshëm ushtarak si një depo hekurudhore apo municioni. Sulmi duket se ka qenë një akt i qëllimshëm i vandalizmit kulturor, dhe jo i pari që nga fillimi i pushtimit rus në shkurt, përcjell rtv21.tv
Skovoroda ishte një figurë udhëheqëse në rilindjen kulturore të Ukrainës në shekullin e 18-të, këtë vit është 300 vjetori i lindjes së tij.
Në një fjalim të shtunën, presidenti Volodymyr Zelensky dënoi sulmin kundër shtëpisë së një njeriu i cili u mësoi njerëzve se çfarë është një qëndrim i vërtetë i krishterë ndaj jetës dhe se si një person mund të njohë veten.
“Duket se ky është një rrezik i tmerrshëm për Rusinë moderne: muzetë, qëndrimi i krishterë ndaj jetës dhe vetë-njohja e njerëzve”, tha Zelensky, raporton CNN

Zelensky përsëriti temën kur shënoi Ditën e Fitores, duke cituar fjalët e Skovorodës në një mesazh tjetër publik të hënën: “Nuk ka asgjë më të rrezikshme se një armik tinëzar, por nuk ka asgjë më helmuese se një mik i shtirur”.
Trashëgimia e Skovorodës është bërë simbolike e asaj që Zelensky dhe ukrainasit e tjerë e quajnë luftën midis dy pikëpamjeve të botës – atyre të lirive individuale dhe demokracisë kundër një autoritarizmi të ri të nxitur nga paragjykimi.
Guvernatori i Kharkiv, Oleh Synyehubov, tha në një postim në Telegram: “Okupatorët mund të shkatërrojnë muzeun ku Hryhoriy Skovoroda punoi vitet e fundit të jetës së tij dhe ku u varros. Por ata nuk do të shkatërrojnë kujtesën tonë dhe vlerat tona!”./21Media