Murati fajësoi LDK-në, përgjigjet Hoti: Inflacioni kufizohet me ligje vetëm në sistemet komuniste

Ish-kryeministri i Kosovës, tani deputet i Lidhjes Demokratike të Kosovës (LDK), Avdullah Hoti, i është kundërpërgjigjur ministrit të Financave, Hekuran Murati, i cili sot tha se si pasojë e asaj që LDK-ja e ka dërguar në Gjykatën Kushtetuese Ligjin për çmimet tavan, qytetarët po paguajnë më shtrenjtë për produktet: vaj, miell dhe bukë.

Hoti ka thënë se po të mund të kufizohej me ligj rritja e çmimeve në ekonominë e tregut, “sigurisht se gjermanëve, amerikanëve, britanikëve, e shumë të tjerëve që kanë ekonomi tregu, do u kishte ra ndërmend deri më tani”.

“Në fakt, po, inflacioni mund të kufizohet me ligj, por vetëm në sistemet komuniste. Kosova është vend i lirë, me demokraci dhe ekonomi të tregut, e shpallur më 2008, e kundërshtuar nga disa, por tani është realitet që detyrimisht duhet respektuar, përfshirë disa që kanë bindje tjera dhe që stuhia i solli në qeveri”, ka shkruar Hoti në Facebook.

Ministri i Ekonomisë, Hekuran Murati, thka thënë sot se LDK ka ndikuar në rritje të çmimit të vajit dhe miellit pasi e ka dërguar në Kushtetuese ligjin për çmimet tavan, që do ta përcaktonte një ‘tavan’ për çmime të produkteve bazë në treg.

“Ligjin për çmimet tavan, LDK e dërgoi në Gjykatë Kushtetuese. Prandaj qytetarët vazhdojnë të paguajnë më shtrenjtë se që do duhej për vaj, miell e bukë”, ka shkruar Murati në Facebook.