Vela e quan “palaço” MPJ-në serbe: Nëse Serbia voton kundër Kosovës në KE, shkelen këto marrëveshje

April 17, 2023Përditesimi i fundit: April 17, 2023

Shefi i kabinetit të presidentes Osmani, Blerim Vela, i ka reaguar ministrit të jashtëm të Serbisë, Ivica Daçiq, pasi deklaratave të këtij të fundit lidhur me anëtarësimin e Kosovës në Këshillin e Evropës.

Daçiq ka thënë se ai nuk synon të shkojë në Strasburg të martën, në përvjetorin e 20-të të pranimit të Serbisë në Këshillin e Evropës, nëse Kosova do të pranohet në atë institucion një ditë më vonë.

Ai ka thënë në një konferencë për media, pas takimit me ministren e Jashtme të Gabonit, Yolanda Nijonde, se në 10-vjetorin e arritjes së Marrëveshjes së Brukselit – mes Kosovës dhe Serbisë – është bërë e ditur që Komiteti i Ministrave të Këshillit të Evropës, do të nisë procedurat për pranimin e Kosovës në atë institucion.

“Kosova nuk i ka përmbushur obligimet e veta, që i parasheh Marrëveshja e Bruselit që 10 vjet, dhe për këtë gjë, ajo duhet të shpërblehet dhe të nisë procedura për pranimin e saj në Këshillin e Evropës. Ky është mesazh që Kosova mund të bëjë çfarë të dojë”, ka thënë Daçiq.

Vela reagoi duke e quajtur “palaço” ministrinë e jashtme serbe dhe përkujtoi se marrëveshjet e Brukselit janë në vijë me lejimin e aplikimit të Kosovës në organizata si KE.

“Një përkujtim për MPJ-në palaço të Serbisë se anëtarësimi i Kosovës në Këshillin e Evropës është plotësisht në përputhje me marrëveshjet: Bruksel 2013: pika 14 Bruksel 2023: pika 4”, ka shkruar Vela në Twitter.

Tutje, Vela tha se nëse Serbia voton kundër, është shkelje e Marrëveshjeve.

“Nëse Serbia voton kundër anëtarësimit të Kosovës në Këshillin e Evropës, kjo do të jetë në kundërshtim të qartë të marrëveshjeve të përmendura!”, përfundoi shefi i kabinetit të Presidencës.

Tags
April 17, 2023Përditesimi i fundit: April 17, 2023
Back to top button