Opozita nuk voton për ndryshimin e rendit të ditës, kërkon ekzekutimin e pagave për grevistë

Partitë opozitare kundërshtuan kërkesën e Vetëvendosjes që që në rend dite në seancën e sotme plenare të futen pesë pika që janë marrëveshje ndërkombëtare duke i konsideruar të rëndësishëm dhe urgjente. Partitë opozitare kërkuan që Qeveria e Kosovës të bëjë ekzekutimin e pagave për mësimdhënësit.
Shefi i grupit parlamentar të Lidhjes Demokratike të Kosovës, Arben Gashi tha se deputetët nuk duhet të sillen normalisht derisa janë mbi 26 mijë familje të mësimdhënësve që sipas tij kanë mbetur pa të hyra.
“Po propozoni me marrë kredi sepse i duhen Kosovës, pajtohem që i duhen paratë Kosovës por të njëjtën kohë mbi 26 mijë ua keni ndalë të ardhurat bazë, ata nuk kanë bukë sot me ble, nuk kanë dru me ble, nuk mund të ngrohen sot, nuk mund të paguajnë kredi, ndërkohë i keni bë 800 milion euro pa shfrytëzu e hajde të marrim kredi, ju nuk mund t’i shfrytëzoni paratë e buxhetit qysh mund t’i shfrytëzoni kreditë, nuk dini me i shfrytëzu paratë e buxhetit të shtetit… 26 mijë familje nuk i kanë marrë pagat e tyre, kjo është urgjenca, duhet patjetër me i marrë pagat, nuk mund të aktrojmë këtu sikur gjithçka është normale, prandaj për ne propozimi është i papranueshëm”, deklaroi Gashi.
Kurse, Shefi i deputetëve të Partisë Demokratike të Kosovës, Abelard Tahiri deklaroi se do t’i kthehen normalitet kur të ekzekutohen pagat për mësimdhënësit.
“Po kërkoni bashkëpunimin tonë, por në anën tjetër përmes videomesazheve po iu tregoni qytetarëve se qysh opozita po e lufton këtë vend. Ne deri sot fatmirësisht, në secilën iniciativë të rëndësishmeve ju kemi përkrah dhe mbështet. Mos me qenë ne, ju asnjë marrëveshje ndërkombëtare nuk do të mund ta kalonit…Besoj se ju do të reflektoni se në ditët në vazhdim ju do të reflektoni që t’i ekzekutoni pagat për mësimdhënësit, pastaj edhe ne do t’i kthehemi normalitetit”, theksoi ai
E shefi i deputetëve të Aleancës për Ardhmërinë e Kosovës, Besnik Tahiri tha se nuk do të votojnë asnjë marrëveshje dhe projektligj derisa të ekzekutohen pagat për mësimdhënësit.
“Aleanca për Ardhmërinë e Kosovës nuk do të votojë asnjë marrëveshje, as ndërkombëtare, as kurrfarë marrëveshje kurrfarë strategjie nëse nuk veproni shpejtë me pagat për grevistë dhe për ligjin e pagave, mos pritni për ne, prej neve nuk keni asnjë votë as për marrëveshje ndërkombëtare as për ligj tjetër derisa nuk përfundon saga rreth grevistëve”, potencoi ai.
Arbëreshë Kryeziu nga Lëvizja Vetëvendosje e cila propozoi ndryshimi ne rendit të ditës, tha se marrëveshjet ndërkombëtare janë të rëndësisë urgjente.
“Këto nuk janë kredi, janë marrëveshje ndërkombëtare të cilat janë specifikisht të destinuara se ku dedikohen këto mjete në momentin kur fillon zbatimi i këtyre marrëveshjeve. Duke pasur parasysh rëndësinë që kemi të bëjmë me marrëveshje ndërkombëtarë të cilat janë urgjente për shkak se disa prej tyre e kanë afatin kohor të limituar kur duhet t’i votojmë këtu në kuvend, mendoj është e rëndësishme të përkrahen nga deputetët e të gjitha grupeve parlamentare”, ka thënë ajo.
Me votat kundër të opozitës nuk është miratuar plotësimi i rendit të ditës për seancën e sotme.